ANTÓN GARCÍA

Ente'l rebumbiu que se forma porque l'Ayuntamientu d'Uviéu dexe de patrocinar el premiu «Tigre Juan» de novela pasa desapercibida la noticia de que tampoco van volver a convocase los «Uviéu» de narraciones, poesía y teatru. Lo del «Tigre Juan» podía esperase, porque los sucesivos cambios nes bases de la so convocatoria (de premiu a llibru inéditu pasó a premiar obra publicada, volvió a la inédita...) anunciaben que dalgo nun diba bien. Pero, contra lo que se diga, nin nos meyores tiempos del premiu tuvo una gran proxección mediática o popular. Na primer etapa llogró facese un nome n'Asturies y sonar bien ente los escritores españoles que se movíen alredor de Juan Benito Argüelles y lo que terminaría siendo Tribuna Ciudadana. Tuvo grandes aciertos lliterarios, con poca incidencia ente'l públicu. Por exemplu, la obra de Luis Sepúlveda que ganó en 1988, cuando esti escritor yera un desconocíu, «Un viejo que leía novelas de amor», durmió'l suenu de los xustos nos almacenes de Silverio Cañada hasta que Sepúlveda rescató los derechos pa editala comercialmente: pa convertise nun gran éxitu tuvo que desprendese del premiu. Ente 1990 y 2004, na segunda etapa del «Tigre Juan», cuando se daba a la primer obra publicada d'un escritor, llogró resistir bastante bien les presiones editoriales y mantenese como un premiu independiente, contando ente los sos ganadores a escritores mozos qu'empezaben a despuntar. Depués de trenta años convocándose, el «Tigre Juan» yera un premiu bien dignu, ye verdá que con una traxectoria cambiante que lu fexo quedar en tierra de naide, pero nun merecía morrer.

Tampoco debíen desaparecer los premios «Uviéu», convocaos per primer vez en 2006, que premiaben narrativa, poesía y teatru en llingua asturiana. Cuento que la cayida del «Tigre Juan» arrastró a estos otros. Chócame nun sentir a naide llamentase porque la Casa'l Conceyu dexe de convocar estos premios que lleven el so nome na llingua del país. L'Ayuntamientu taba orgullosu d'ellos y tenía razones, porque podíen terminar siendo de referencia pa la lliteratura asturiana. Ye verdá que foi un error que los llibros premiaos los publicara l'Academia de la Llingua Asturiana: una institución académica nun debía facer la competencia editorial a la empresa privada, y un ayuntamientu debería axudar a les editoriales asturianes cuando tien oportunidá. En poesía diba costa-y más llegar a ser un referente, compitiendo con premios asentaos como'l «Teodoro Cuesta», el «Xuan María Acebal», el «Fernán-Coronas» y otros. Pero nos otros xéneros yera distinto. Un premiu pa narrativa como'l que convocaba l'Ayuntamientu d'Uviéu sigue teniendo sitiu n'Asturies, onde namás el «Xosefa de Xovellanos» y el «Trabe» s'ocupen de premiar un llibru con dotación económica significativa. Lo mesmo pue dicise del teatru, onde la posibilidá d'estrenar la obra yera una prestosa novedá non conocida nesti ámbitu. Pero pa prestixar unos premios nun basta con dotalos bien económicamente. Cuenta la traxectoria, y la de los premios «Uviéu» nun llegó mui allá. Seguro qu'había otros sitios onde aforrar, que tampoco l'Ayuntamientu d'Uviéu invierte tanto na llingua asturiana.

(de La Nueva España, 03-11-2009)