La Directora Xeneral de Política Llingüística, Consuelo Vega Díaz, viaxa’l sábadu 31 d’ochobre a Leeuwarden (capital de Frisia) nos Países Baxos, p’asistir a la sesta edición del “Liet International”, prestixosu festival européu de la canción en llingües minoritaries onde Asturies va tar representada pol cantautor Alfredo González, ganador esti añu del “Premiu al Meyor Cantar” organizáu por esta Conseyería.

Esti Festival nació nel añu 2002 como herederu d’un veteranu concursu de canción frisona —llingua falada nes zones que llenden ente Países Baxos y Alemania— que recibía’l nome de “Liet Ynternasjionaal”. Dada la importante repercusión y interés mediáticu que la competición alcanzara, comenzóse a ampliar adulces el so radio d’acción cola idea de mostrar y apoyar la gran diversidá llingüística esistente nel continente européu, y divulgar les distintes propuestes musicales qu’usen estos idiomes. D’esta manera, el LIET convirtióse “nuna eurovisión” de les llingües minoritaries. La cooperación del Gobiernu del Principáu d’Asturies cola Fundación Liet afianzóse demientres d’esti añu, cuando se xestionó la participación nel Festival Liet d’un representante oficial d’Asturies, que sería’l ganador del Premiu al Meyor Cantar.

La edición d’esti añu va celebrase nel Teatru De Harmonie de la capital frisia y nél van participar once grupos o cantantes finalistes. Ente ellos figuren los cantantes o grupos vencedores de distintos certámenes rexonales (frisiu, célticu, sami en Laponia, asturianu…), a los qu’hai qu’unir otros que son invitaos directamente polos organizadores o escoyíos por un Xuráu especializáu.

El representante asturianu nel xuráu del “Liet International” ye Lisardo Lombardía, reconocíu especialista musical con una amplia trayectoria como periodista, promotor musical, responsable de la discográfica asturiana Fonoastur y director artísticu del Festival Intercélticu de Lorient.Esti alcuentru ye un escaparate inmeyorable pa dar a conocer el fechu llingüísticu asturianu fuera de les nuestres fronteres y permitir qu’un públicu ampliu aprecie la calidá de la música fecha n’asturianu na actualidá.

(de la Dirección Xeneral de Política Llingüística, 28-10-2009)