El miércoles 21 d'ochobre, a les 19:00 hores, la Directora Xeneral de Política Llingüística, Consuelo Vega Díaz, asiste na sede madrileña de la Librería La Central (Muséu Reina Sofía; Ronda de Atocha, 2) a la sesión inaugural del ciclu "A dos voces", onde los escritores José María Merino y Xuan Bello van debatir d'"El sentimiento de la tierra", analizando la importancia de lo rural y la visión campesina na lliteratura moderna. Esta sesión va tar moderada pol escritor Félix Romeo.

El ciclu "A dos voces", organizáu pola Librería Central cola collaboración del Institutu Ramón Llull y la Conseyería de Cultura y Turismu del Principáu d'Asturies, ye un ciclu de conferencies conversaes, d'ensayos falaos a dos voces onde se propón un recorríu por dalgunos de los temes qu'ocuparon más páxines impreses nos años últimos. Tres de la inaguración esti 21 d'ochobre, el ciclu va continuar con otres seis sesiones onde va debatise sobre les rellaciones ente creación lliteraria y traducción; el relevu xeneracional en poesía; la rellectura de los autores clásicos; o les distintes miraes actuales sobre'l fechu narrativu. El ciclu ciérrase'l 16 d'avientu con una llectura poética.

Nesta tercer edición del ciclu participen narradores, poetes y estudiosos en castellanu, catalán y, ye la primer vez, n'asturianu. En concreto, en representación d'Asturies y la llingua asturiana van intervenir Xuan Bello (Paniceiros, Tinéu, 1965), Vanessa Gutiérrez (Urbiés, Mieres, 1980), Berta Piñán (Cañu, Cangues d'Onís, 1963) y Esther Prieto (Arenas de Cabrales, 1960).

ANEXU: Programa del ciclu.

(de la Dirección Xeneral de Política Llingüística, 21-10-2009)