La Oficina Municipal de la Llingua del Conceyu de Xixón editó nestos díes un xuegu destináu principalmente a los neños, anque non necesariamente, que se presenta col títulu de Nun quedes en porrica. Nél, al traviés d’entrugues (sobre temes como xeografía, ortografía o refranes), traballingües o la fechura d’un puzzle, los xugadores van perdiendo o ganando ropa del traxe tradicional asturianu (que se pon y se quita d’unos dibuxos recortaos que representen a dos mozos y dos moces), y gana’l que llegue al final con más prendes puestes. Esti xuegu foi ganador del concursu ¡Vas velo! Trebeyos pal aula, entamáu pola propia Oficina ente los estudiantes d’ESO de los institutos de Xixón. Resultó ganadora la clas de 3.u d’ESO del IES Padre Feijoo.

Nun quedes en porrica vien a sumase a otros xuegos tamien editaos pola Oficina Municipal de la Llingua de Xixón n’años anteriores, casu de Xixonpolis, ¿Qué hai pa comer güeli, De coríu a coríu y el tiru ye míu o El xuegu de la llingua.

La Oficina Municipal de la Llingua ye un serviciu pa tolos ciudadanos, creáu pa fomentar la normalización, l’usu y la presencia del asturianu en tolos ámbitos de la vida social y cultural del Conceyu de Xixón. Organiza campañes empobinaes a dellos sectores de la población de Xixón: pal comerciu, pa les escueles d’Educación Primaria y Infantil, pa la hostelería, pa los alumnos y alumnes d’Enseñanza Secundaria... amás d’asesorar, informar y ayudar a toles persones interesaes na llingua asturiana.

(de la Estaya d'Asturianu de la RTPA, 11-10-2009)