El Serviciu de Normalización Llingüística (SNL) y el Conceyu de Cangas del Narcea acaben de convocar la que yá ye octava edición del Concursu de Rellatos Curtios del Conceyu de Cangas del Narcea.

Nesti certame pueden participar toles persones que sían mayores de 16 años y pueden presentar una obra por participante. La obra tien que tar escrita n'asturianu estándar o na so variante occidental.

La temática de los trabayos presentaos ye llibre y tienen que tener una estensión de cinco fueyes como mínimu y venti como máximu, con una presentación en DIN A4 a espaciu doble.

Nesta octava edición del concursu va premiase con 400 euros la obra ganadora y tamién va premiase cola mesma cantidá al meyor rellatu escritu n'asturianu occidental.

Los trabayos hai que los presentar por triplicao nes oficines del SNL de Cangas del Narcea (Cai Uría, 13, baxu, 33800 Cangas del Narcea) o per corréu certificáu a la mesma dirección, nun sobre ensin remite que lleve dientro otru sobre ciarráu nel que tean tolos datos del autor o autora.

El plazu pa presentar los trabayos acaba'l 11 de payares d'esti añu.

(de Les Noticies, 08-10-2009)