Suatea acusa a Educación d'obligar a estudiar la optativa de francés a un alumnu qu'escoyera la d'asturianu
El Sindicatu Autónomu de Trabayadores de la Enseñanza d'Asturies (Suatea) acusó güei, nuna nota prensa, a la Conseyería d'Educación de "tratu discriminatoriu" contra un alumnu de segundu d'ESO de Xixón qu'escoyera la optativa d'asturianu, como llevaba faciendo en tola so etapa educativa, y al que, sin previu avisu nin comunicación, incluyóselu na clase de francés.
Según esplicó'l sindicatu, "dempués de recibir clase d'Asturianu en tola etapa Primaria y siguir en primeru la ESO, nel segundu cursu esviáronlu pa la optativa de Francés ensin tenela cursao en primeru, ensin tenela escoyío y, lo que ye más grave, ensin autorización de los pas". "Tórgase-y automáticamente la so escolarizacíon n'Asturianu por ser la única persona de segundu que la escoyó como optativa", esplicó la nota. Amás, denunció que'l trámite fízose "ensin mediar comunicación col alumnu nin la familia".
Suatea reconoz que la resolución 16 de mayu de 2008 de la Conseyería d'Educación, pola que s'establez la ufierta y les condiciones pa la elección de materies optatives y materies opcionales pa la Educación Secundaria Obligatoria, fala d'un mínimu d'ocho alumnos pa formar un grupu d'una optativa", pero recuerda que "prevé qu'escepcionalmente se formen grupos con menos alumnos".
Suatea exixó qu'anque seya 'escepcionalmente' pa la Conseyería, "se respeten los derechos del alumnáu asturianu, s'acabe cola situación d'escepcionalidá de la enseñanza de la nuesa llingua y se dicten normes y reglamentos acordies coles lleis vixentes".
(d'Europa Press, 01-10-2009)
Tags: Suatea Conseyería+d'Educación+del+Principáu+d'Asturies
Esbilla | 
del.icio.us
Bono, esto ye una consecuencia más de cómo ta la cosa.
Primero ta l'ambiente: ente los pás muévense dos idees, promocionaes pol gobiernu:
1. Estudiar francés (o alemán o lo que seya) ye útil. Naide esplica pa qué nin por qué, cenciellamente ye así. Amás suponse qu'alumnos que lleven años y paños estudiando inglés y nun son quien a facer una conversación cenciella nesi idioma van facelo en francés (o alemán o..) estudiando una asignatura optativa dos hores selmanales cuatro (o seis años nel meyor de los casos)
2. Asturianu estúdienlo los mataos. Naide tampoco diz d'onde se saca esa idea, cenciellamente ye así.
Per otru llau l'alministración, que nun mata la nuestra llingua porque nun ye quien a ello ayuda como pue::
1. Otres asignatures, llingüístiques, estúdiense pola so supuesta utilidá (véase puntu primeru separtáu anterior), l'asturianu ye una custión d'amor. Cada vez que se fala de que saber asturianu tenga un valir pa una oposición cualquiera, enseguida se fala de discriminación y nun sé cuantes coses más. Eso sí, puestos d'esta manera, y tando na comunidá europea, habría que pensar si pidir saber castellanu nun ye discriminador.
2. Faense embudos. En 4º la ESO, dende va dos años, la llingua asturiana nun compite nel grupu optatives 1 (col francés y demás llingües por exemplu) onde s'escuyen tres d'ente les posibles, sinón nel grupu 2 (con asignatures de lo más variao) onde s'escueye una d'ente les posibles. D'esta manera, nesti cursu ye entá más difícil (y mira que yera complicao facelo más difícil) estudiar asturianu y, si los chavales "escapen" en 4º, olvídate de los bachilleres.
Vamos, qu'esta, como siempre, ye xera d'héroes