Siguen desarrollándose intensamente les munches actividaes previstes nel programa del alcuentru cultural Arribada 2009. Asina, el martes 29 de setiembre nel Centru de Cultura Antiguu Institutu (CCAI) de Xixón el cine, la lliteratura y el teatru van protagonizar esa xornada.

A les 17:00 hores, nel Salón d’Actos del CCAI va proyectase la película L’acorazáu Potemkin, en versión orixinal pero cola singularidá d’incluír subtítulos n’asturianu. Esti filme, rodáu en 1925 pol director rusu Serguéi Eisenstein, considérase como ún de los más grandes de la historia del cine.

A les 18:30 hores, nel patiu del mesmu sitiu, José Luis Campal va pronunciar la conferencia titulada Serenidá y fondura na obra d’Humberto Gonzali nel nuevu mileniu. Esti autor dedícase fundamentalmente a la poesía, anque nun escaez la narrativa, tien una obra bien estensa qu’inclúi tamién delles traducciones.

A les 19:30 hores, nesi mesmu sitiu, va facese la presentación del llibru Discursos llingüísticos y movimientu obreru na Asturies decimononica (1870-1898), del historiador Rafael Rodríguez Valdés. Con esta obra ganó la primer edición del Premiu d’Ensayu Federico Fierro Botas, entamáu pol Conceyu de Xixón. Yera la primer vez que se trataba fondamente’l tema de la rellación ente’l movimientu obreru de finales del sieglu XIX y la llingua asturiana.

Pa lo último, a les 20:30 hores, nel Salón d’Actos, va zarrase la sesión d’esi día cola estrena de la obra de teatru La igua, de Xaviel Vilareyo. Los actores encargaos de la so representación van ser María Xesús Rodríguez y Jesús Menéndez. La igua ye una metáfora de los conflictos internos colos que s’enfrenten los ideales y ambiciones de cualquier personaxe humanu inmersu nun mundu problemáticu y onde la solución y la escoyeta llibre del destín faise cada vez más abegosa.

(de la Estaya d'asturianu de la RTPA, 28-09-2009)