XOSÉ LLUIS CAMPAL

Ente los fastos planificaos pa entretener a Isabel de Borbón nes sos vacaciones en Xixón, hubo lloes poétiques. Pachín de Melás regaló-y un ‘Saludu a la Infanta Dª Isabel’ (El Comercio, 17- VII-1909), composición recitada nel teatru Xovellanos el 16 de xunetu d’hai un sieglu. Empicipiaba colos versos que-y ufriera Tiadoro Cuesta a ‘La Chata’ nel XIX y pesllábase col ruegu de que nun s’escaeciere d’Asturies.

Enfanta bondosa,
bondosa, per güena,
amparu del probe
que xime de pena.
Tu yes la q’ampuxes
coyendo lixera
al güérfanu artiste
con fame y miseria.
Ya tas nesti pueblu
que ta te recuerda
el día qu’un tiempu
triaste ista tierra.
Y hoy como entoncies
y fai riverencia
a la Rial Enfanta
tan ñoble, tan güena.
(...) Enfanta bondosa,
Enfanta Sabela,
non ye esti saludu
con sones de guerra
con gritos que plasmen
con ruidu q’atruena.
Aquesti saludu
de la ñoble tierra
ye amante y sinceru,
tal como lo sienta
quien n’el alma allugue
amor y ñobleza.
Por eso mereces
q’el pueblu te quiera;
y Xixón queríu,
que a ti te venera,
dizte n’esti estante
na fabla melguera:
«Enfanta bondosa,
Enfanta Sabela,
corazón d’amores,
alma de mantega,
ascucha al copleru,
a Tiodoro Cuesta,
que asina falaba
cuando to realeza
trió, ya fai tiempu,
la asturiana tierra».

(d'El Comercio, 26-09-2009)