Güei empiecen les clases del cursín d'asturianu que tien programáu pa esti veranu'l Serviciu de Normalización de la Comarca en xunto cola Asociación de Muyeres Conceyar de Camás, en Cabranes, cola collaboración d'esti últimu conceyu.

El cursu, d'alfabetización n'asturianu y de 20 hores de llargor, va durar hasta mediaos d'agostu, con clases repartíes ente los martes y los xueves, de seis a siete y media de la tarde, nes antigues escueles del pueblu qu'anguaño funcionen de centru social del llugar.
La inscripción ye de baldre y cualquiera pue incorporase a les clases cuando meyor-y pete.

Ye bien guapo como se pue llegar a axuntar, nun pueblín de malapenes 110 habitantes como Camás, un grupucu de persones interesaes n'afondar, nuna parte del añu tan poco dada a esti tipu de coses, nos sos conocimientos en llingua asturiana.

Hemos agradecer al Serviciu de Normalización Llingüística de Mieres l'emprestanos amablemente material didácticu pal cursu.

Nun han escaecer les asociaciones de tou tipu de la comarca que l'Academia de la Llingua Asturiana sigue poniendo a la so disposición, de baldre, cursos d'alfabetización n'asturianu de 35 hores, pa los que namás se pide un "ratio" mínimu de 12 alumnos. Si ye que nun s'algama esta cifra, como ye nel casu del de Camás, tamién se pue encargar el cursu al Serviciu de Normalización, alcordando con esti feches y horariu.

(d'El Solanu, 30-06-2009)