El martes 23 de xunu, a les 19:30 hores, nel Salón d’Actos de La Casa los Alberti, en Ciañu, va facese la presentación del llibru Teatru n’asturianu 2009, una esbilla d’obres escrites en llingua asturiana y que van poner n’escena compañíes integraes en FETEAS. Estes pieces son: Figenia en La Peruyal, d’Ana Cristina Tolivar Alas; L’Encierru, de José Ramón López Menéndez; y Cambiu Radical, de Lisardo Suárez Fernández. La entrada ye de baldre y va entregase un exemplar del llibru presentáu a tolos asistentes al actu.

El Centru de Referencia de la Cultura y la Llingua Asturiana Casa de los Alberti allúgase nel distritu llangreanu de Ciañu, na antigua casona solariega edificada pola familia Buelga nel sieglu XVII y restaurada por alumnos de la Fundación Comarques Mineres pa la Formación y Promoción del Empléu. Nació con vocación de convertise nun sitiu de referencia pal estudiu de toles manifestaciones de la cultura tradicional del país y, sobre manera, de la llingua asturiana. Ta equipada con una fonoteca de música asturiana y una biblioteca inaugurada con 650 volúmenes donaos pola Conseyería de Cultura y a los que se van dir sumando otros materiales nestos meses.

Otra manera, bona parte de la documentación disponible va proceder de l’Academia de la Llingua Asturiana, institución cola que’l Conceyu de Llangréu firmó va un añu un conveniu de collaboración pa dotar de conteníos a la Casa de los Alberti.

(de la Estaya d'Asturianu de la RTPA, 22-06-2009)