Los díes 5 y 6 de xunu la Conseyería d’Educación y Ciencia del Principáu d’Asturies y el Centru del Profesoráu y de Recursos (CPR) d’Avilés, entamen la I Sestaferia del Profesoráu en Llingua Asturiana (Xornaes de desarrollu curricular y didácticu). Nel trescursu d’ella van entamase delles ponencies y alderiques sobre’l proyectu llingüísticu de centru y la concreción de los currículos de Llingua Asturiana tanto de Primaria y Secundaria como’l posible tratamientu d’esti idioma na Educación Infantil y na enseñanza de persones adultes. Amás d’eso van tratase tamién delles cuestiones metodolóxiques teóriques y práctiques sobre l’usu de les tecnoloxíes nueves nes clases d’asturianu, aparte del análisis de ferramientes didáctiques pa trabayar tolos aspectos de la materia: la lliteratura en prosa y versu, el cómic, el cine, la música, etc.

Ente los ponentes tán docentes y especialistes na materia como Xosé Antón González Riaño, Genaro Alonso Mejido, Nel Caldevilla, Xulio Berros, Aurora Bermúdez Nava o Nacho Fonseca, que van presentar ponencies como Música y Llingua Asturiana. Una propuesta pa secundaria, Cine y televisión, nueves posibilidaes de trabayu col material audiovisual, Idees pa trabayar la llingua eo-naviega nel aula, Trabayar col cómic nes clases de lingua o L’usu de les nueves tecnoloxíes como recursu didácticu na clas.

A lo llargo d’estes dos xornaes les editoriales van esponer los sos materiales sobre la materia. Los asistentes que se matriculen van ganar 1’5 creitos de formación.

(de la Estaya d'Asturianu de la RTPA, 04-06-2009)