L'alcaldesa de Llangréu, Esther Díaz -acompañada pola conseyera de Cultura y Turismu, Mercedes Álvarez, y el director de la Obra Social y Cultural de Cajastur, José Vega-, inauguró'l xueves 14 de mayu, a les 12 de la mañana, el Centru de Referencia de la Cultura y la Llingua Asturiana Casa de los Alberti. Esti equipamientu allúgase nel distritu llangreanu de Ciañu, na antigua casona solariega edificada pola familia Buelga nel sieglu XVII y restaurada por alumnos de la Fundación Comarques Mineres pa la Formación y Promoción del Empléu (Fucomi).

Según esplicó Esther Díaz, la Casa de los Alberti naz con vocación de convertise nun sitiu de referencia pal estudiu de toles manifestaciones de la cultura tradicional del país y, sobre manera, de la llingua asturiana. Ta equipada con una fonoteca de música asturiana y una biblioteca inaugurada con 650 volúmenes, a los que se van dir sumando materiales nos próximos meses. Bona parte de la documentación disponible va proceder de l'Academia de la Llingua Asturiana, institución cola que'l Conceyu de Llangréu firmó va un añu un conveniu de collaboración pa la dotación de conteníos a la Casa de los Alberti.

Los investigadores y toles persones interesaes van disponer de sales d'estudiu y puestos d'accesu a internet. Amás, va ser la sé del Serviciu Municipal de Normalización Llingüística y cuenta con un salón d'actos y una sala de reuniones polivalente allugaos nel primer pisu.

El sobráu, añadíu cuando la rehabilitación, ye ún de los espacios más llamativos del equipamientu nuevu, pues acueye una esposición sobre la indumentaria tradicional asturiana ellaborada pola Agrupación d'Etnografía y Folclor Reija, de Llangréu.

(de Les Noticies, 14-05-2009)