PABLO R. GUARDADO

A pesar de la bona acoyida del asturianu ente la población y de que l'idioma asoma de ralo en ralo ensin complexos na vía pública, la llingua d'Asturies nun acaba d'entrar nes grandes superficies y centros comerciales. La presencia del asturianu nellos ye testimonial en dalgunos casos y inexistente na mayoría, munches veces pola desidia de les direcciones d'estos centros, anque tamién tien que ver la inorancia de los sos cabezaleros. Nuna ronda de llamaes per estos establecimientos fecha por Les Noticies, más d'una vez se sintió la pallabra dialectu al referise al asturianu, lo que da bona cuenta d'esa actitú.

La situación que s'acaba de describir contrasta cola de los comercios pequeños, más enfotaos nel tema del asturianu, como demuestra la so participación tan curiosa nes campañes entamaes polos servicios de normalización de dalgunos conceyos, como ye'l casu de Xixón y Mieres, o'l de la Conseyería de Cultura col repartu de lletreros de Rebaxes. Namás fixo falta salir a la cai pa poder velos na mayoría de los escaparates d'estos establecimientos. L'usu del asturianu nes tiendes, más cercanes al veceru, ye tamién más corriente y el respetu a les denominaciones usaes n'Asturies suel ser muncho mayor. Asina, nes pescaderíes de barriu ye vezu ver los nomes de los pexes n'asturianu y nes tiendes d'alimentación nun s'alcuentren marañuelas ente los productos espuestos.

Ye difícil acudir a una gran superficie n'Asturies, país punteru nel Estáu español na presencia d'esti tipu d'establecimientos, y dar con rótulos n'asturianu. Ún de los pocos ye Decathlon, tienda de deportes de capital francés asitiada nes afueres de Xixón y en Llugones que, dende la so llegada a la villa de Xovellanos nel 2001, respeta la toponimia y saluda a los sos visitantes con un calorosu «Afayáivos». Dientro, tovía ye posible ver los rótulos de los baños en llingua asturiana, pero poco más. Nin nos pasillos, nin en nengún folletu destináu a los veceros usen l'asturianu y, según los responsables de la tienda, nun tienen nada previsto al respective.

En Caudalia, centru comercial asitiáu nel conceyu de Mieres, la situación ye aparecida. «Tenemos dalgún lletreru n'asturianu, como los qu'hai nos baños, pero los indicadores nun tán traducíos», esplica Pilar Suárez, adxunta a la xerencia de la galería comercial. Actividaes pa críos y dalguna esposición con temática local son les úniques muestres de cultura asturiana que los clientes pueden disfrutar na gran superficie más nueva d'Asturies.

Otres empreses quieren marcar el ritmu según «lo dea la sociedá», afirma Alfonso Fuertes, director de Comunicación d'El Corte Inglés n'Asturies. Los centros comerciales y supermercaos d'esta firma d'orixe asturianu nun cuenten con rotulación nin propaganda en llingua asturiana, pero sí ye posible alcontrar discos y llibros nesta llingua nos estantes de les sos tiendes. Inclusive, El Corte Inglés tamién participa nel Día del llibru n'Asturianu que se celebra na Selmana de les Lletres. Un xestu pequeñu que, en comparanza cola situación del asturianu nos demás establecimientos, ye bien meritoriu.

«Nel tema llingüísticu nun dimos nengún pasu alantre porque pensamos que nun ye una función nuestra. Nosotros vamos siempre a aplicar la llexislación que vaiga marcando'l Gobiernu d'Asturies en tou momentu, ensin nengún prexuiciu», comenta Fuertes, que recuerda qu'esta política ye la que vien aplicando El Corte Inglés en tolos territorios con llingua propia. «Trátase l'idioma na midida qu'esixe la llexislación de les respectives comunidaes autónomes», añade.

La cultura asturiana tien un güequín dende hai ocho años n'Ámbito Cultural, l'espaciu de cultura d'El Corte Inglés, que lleva alantre una bona cantidá d'actividaes nos centros de Xixón y Avilés. Conferencies, conciertos y esposiciones de pintores asturianos son dalgunes de les opciones qu'ofrez esta iniciativa, que l'añu pasáu incluyó un ciclu sobre la tonada asturiana n'Avilés y otru de teatru asturianu.

Onde l'apueste sí que ye fuerte ye na promoción de los productos asturianos, tanto nel país como nel restu l'Estáu. «Tenemos un compromisu pa colos proveedores asturianos pa que puedan poner tolos sos productos en tolos centros d'El Corte Inglés. Asina, tolos Club del Gourmet d'España tienen sidra asturiano, ente otros productos, y cada añu vamos aumentando la presencia d'ellos», esplica'l director de comunicación, que destaca la importancia de la Feria de Productos Asturianos, organizada anualmente n'Asturies en collaboración col Gobiernu.

(de Les Noticies, 26-03-2009)