ASOCIACIÓN DE TRABAYADORES DE LA NORMALIZACIÓN LLINGÜÍSTICA

L'Asociación de Trabayadores de la Normalización Llingüistica d'Asturies llevamos tiempu asperando ver cumplise les promeses que dende'l Principáu se fexeron pa crear un Serviciu de Normalización en Corvera. Vemos agora la convocatoria d'una plaza que se denomina 'responsable de la Casa de la Llingua del Conceyu Corvera'. Si esto ye'l serviciu demandáu y anunciáu, mal empecipiamos. La mesma convocatoria pa la seleición de la persona que tien qu'ocupala ta lloñe de los mínimos que s'han desixir.

Hai más nada qu'una valoración de méritos y una 'entrevista curricular'. Polo tanto nada de los mínimos demandaos dende esta asociación y que se cumplieron na mayor parte de los procesos de seleición d'otros Servicios de Normalización: un esame escritu y un esame oral; arriendes de la valoración de méritos. Pero ye que, amás, nos méritos nun se pide nenguna de les titulaciones qu'anguaño hai n'Asturias pa demostrar dalgún tipu de formación académica en llingua asturiana: títulu d'espertu de la Escuela de Maxisteriu, títulu d'especialista de la Facultá de Filoloxía o cursos de l'Academia de la Llingua Asturiana. Van valorase unos xenéricos 'cursos de llingua asturiana, lliteratura o cultura asturiana'.

Nun hai temariu dalu, pero sí se diz que se na 'entrevista curricular' va 'profundizase sobre distintos aspeutos de la cultura asturiana y del procesu de normalización sociollingüistica de la llingua asturiana'. Abúltamos qu'hai maneres más oxetives y contrastables pa valorar la capacidá d'una persona al respective de la normalización sociollingüística que la 'entrevista curricular'. Volvemos a insistir nos conocíos y habituales esámenes orales y escritos sobre un temariu y la titulación académica.

Dende l'Asociación de Trabayadores de la Normalización Llingüística siguimos aguardando pola creación de la plaza pa un Serviciu de Normalización Llingüistica en Corvera. Si con esta convocatoria se quier cubrir esi perfil de trabayador/a paezmos que se trabaya por dir nel sen contrariu d'afitar institucionalmente'l trabayu de la normalización de la llingua asturiana.

(d'El Comercio, 05-12-2008)