José Antonio Martínez, Catedráticu de Llingua Española na Faculta de Filoloxía, ye una de les persones más prestixoses del so área. Decanu d'escepción, tres la dimisión de la catedrática y presidenta de l'Academia de la Llingua por causa de la negativa de la Xunta de la Facultá a da-y a la llingua asturiana'l mesmu rangu qu'a otres disciplines, Martínez pretende agora («con un optimismu colos pies en suelu») enveredar la situación y reintroducir la llingua asturiana como un 'minor', lo que diba garantizar los estudios de Filoloxía Asturiana na Universidá d'Uviéu.

A pesar de les informaciones avanzaes ayeri en «La Nueva España», alvierte José Antonio Martínez, el procesu inda ta en calles y tovía falta un arduu trabayu, d'equí a payares, pa que llegue a pintoiru. De momentu, el decanu tien previsto unes intenses xornaes selmanales con cada departamentu, atopaes colos estudiantes, pulsando la opinión real sobre esti asuntu y otros. Una y bones se dea la concreción del proyectu, too ello ha siguir un camín formal: tien que pasar pela Comisión de Docencia y Calidá, depués pel Conseyu de Gobiernu de la Universidá y, finalmente, pela Xunta de la Facultá onde se va votar.

José Antonio Martínez prevé qu'una y bones se llegue a esti términu ye posible que se presenten enmiendes parciales, pero que nesi pos yá se va poder dar el plan d'estudios de Filoxía por establecío.

Inda prematuro, José Antonio Martínez tarrez crear falses espectatives y diz que nun ye'l momentu d'echar les campanes al vuelu porque nun hai nin vuelu nin campanes. «Espero que la Filoloxía Asturiana entre como un 'minor', pero nun m'atrevo a dicir que lo vaiga facer puesto que depende de la voluntá d'un colectivu. La mio impresión ye que sí se va aprobar, pienso que la mayoría ta por ello pero nun descarto que se presenten enmiendes contraries. Dependerá, como nes elecciones americanes,de quien vaiga a votar, de que la xente nun quede en casa. Polo que tengo falao, con too y con eso, puedo ser optimista nesta materia colos pies en suelu».

(de Les Noticies, 8-10-2008)