XOSÉ LLUIS CAMPAL FERNÁNDEZ

Trayemos otra vuelta un nome más de los esaniciaos nos recuentos de la hestoria lliteraria rexonal: Rufino Alonso, collaborador en versu de revistes como la cubana 'Asturias', d'onde sacamos esti embizcante cantu a les escelencies de la ñatura del tarrén propiu, que rezuma un aliendu cuasi místicu (la parte final del testu na que fala del mundu físicu como obra divina asina lo afita) y qu'Alonso asoleyare nel númberu 102, correspondiente al 9 de xunetu de 1916, de la mentada publicación.

Sintamos cómo-y palpita'l corazón telúricu a esti modestu poeta al enveredamos, col so soniquete collorista, pel regustu modernista d'un riscar rellumante nel que s'arrebuxa un sinfín de sensaciones vitales que s'empobinen a una conceición dafechu relixosa de la esistencia:

Ya entama la reitanina
so canción llixera y tierna,
porque ve riscar el alba
coloradina y melguera.
¿Ú s'afaya un paxarín
meyor en toda la tierra
qu'avise más lluego al home
com'un relós sin asfera,
y que cunte los menutos
y dé la hora en so lluenga
faciendo mil gorgolitos
munchu antes de qu'amanezca?
En delguna parte, mialma,
más que'n Asturies, la reina
más soberana y xentil
que tien la ñaturaleza.
Cuando'l alba roxa asoma
so la mar, de la ribera
el home y'l paxarín,
ún a Dios, utru a la fema,
saluden porque en entrambos
el corazón se ximielga
de puro gociar; ¿qué gustu
o qué alegría solmene
al ver la lluz por Oriente
resplandiando 'n'a cabeza
el alma del que sospira
por so patria o por so neña,
o porque non s'adormez
porque y duelga daqué muela,
o porque tien triadura
que al tapecer s'enfurezca?
Sí, neñín, pos ye la lluz
que Dios unvía galvanera,
el ñeral onde les vides
s'afinquen sin que les tuerza
más que la nuechi sombría,
que tien ribetes de güestia.
Al esclucar de la aurora
y a la primera guedeya
del sol, que entama a 'llumar
lo más pruno de la sierra,
óyese gorgolitar
na vecina carbayera
la tropa de paxarinos
que a Dios saluda contenta,
en tanto qu'el home ve,
si abondo escucha y despierta
y a tal teatro abonáu
co' los güeyos s'apareya
so l'alfombra de verdura,
la orbayada, que reflexa
millones de cristalinos
que al rellumu casi ciega
los güeyos del que la mira
pa gociar en so presencia,
verá el güeyín de les roses
que co' les sombres se pieslla,
les llágrimes que vertieren
durante la nuechi negra,
semeyando co' la lluz
cuando el vientu les solmena
una corona de pelres
meyor que la de una reina.
¡Cuayada está la ñatura
que brilla com'una pelra!...
E na mañana de mayu
que Dios fixo pa una fema
redentora nisti mundu,
mediadora 'n utra 'sfera,
Reina y Siñora de él,
Madre común e'na tierra,
esperanza del mortal,
del marinu clara estrella,
Madre de Dios Soberana,
de los Exércitos Reina,
y más pura que la lluz
que Dios nos unvía tan bella.
El fresquillín mermurante
que entre el carbayu se quexa,
entre llascivu y xentil
la rosa llozana besa...
y al claver por machu, xime
al pasar xunta 'l y piega
que tien celos porqu'el probe
xunta la flor se ximielga.
Pasa'l regatu saltando,
semeyando una culiebra
de plata fina y bruñía,
que ruempe escontra la peña,
y al dir besando los xunglos
y flores de la ribera,
mermura amor, sospirando,
y canta a Dios en so lluenga.
La fonte, con un murmullu
qu'a la risina melguera
asemeya, va diciendo
amor, amor, sele y tienra,
mirando al aire burbuyes
qu'a Dios con so cantu lleva.
Y el home co' la campana,
que yá a lo lexos resuena,
lleva la oración del ave
allá onde Dios s'asienta.
Ye la vida, probitín,
soplu divinu que espierta,
y da gracies per gociosa
a quien la fexo y allenta,
y que con un soplu ¡vive!
y que con un soplu ¡rueda!
y que con un soplu ¡para!
y que con un soplu ¡quema!

(d'El Comercio, 30-09-2008)