Falta namás una selmana pa qu'arrinque la tercer edición de L'Arribada, la «vagamar lliteraria» qu'hai dos años empezó a entamar en Xixón l'asociación cultural del mesmu nome y que quier ser una especie d'alcuentru anual alredor de la lliteratura asturiana y les sos influencies. El festival tien anguaño un programa bien intensu qu'abarca más de trenta presentaciones de llibros y seis conciertos, amás d'ocho proyecciones audiovisuales (ente elles el «Frankenstein» de 1910, que según Humberto Gonzali, ún de los organizadores de les xornaes, va ser la primer vez que se proyecte nel Estáu), nueve conferencies y un espectáculu de cuntacuentos.

Los actos van escomenzar a les cinco de la tarde del vienres 12 de setiembre cola llegada al puertu deportivu de Xixón del barcu «Cimavilla I», onde van dir bona parte de los participantes de L'Arribada, y esi mesmu día va celebrase'l primeru de los homenaxes que se contemplen esti añu. El destinatariu ye Antonio González Busto, escritor cuasi desconocíu al que dende l'asociación consideren el «decanu» de les lletres asturianes y que va recibir l'aplausu de los asistentes al Centru de Cultura Antiguu Institutu na primer xornada de los alcuentros. L'otru homenaxáu -anque nesti casu l'actu va celebrase'l xueves 18 de setiembre- va ser Luciano Castañón, un de los autores asturianos más relevantes del sieglu xx que, anque escribió tola so obra lliteraria en castellanu, siempre punxo muncha atención pa la cultura asturiana y les sos manifestaciones.

Otra de les tradiciones d'esta cita, la llectura de testos lliterarios n'asturianu al cargu de dellos representantes de los grupos políticos nel Conceyu de Xixón, va ser la que marque l'empiezu definitivu de los alcuentros.

Les presentaciones de llibros van iguar, igual que los otros años, la mayor parte del programa. Rubén d'Areñes («Los veinticinco pasos»), María de Francia («Lais de la vieya Bretaña»), Faustino Zapico («La revolución de mayu de 1808» y «El nacimientu d'una nación: historia de Sudáfrica»), Pilar Sánchez Vicente («La diosa contra Roma»), Neto («Na punta (la llingua)»), Xandru Martino («Refraneru temáticu asturianu»), Lluis Nel Estrada («Con tastu a sidra»), María Esther García López («Pisadas»), Xuan Santori («La fábrica de lluz»), Xabiel García Pañeda y Rubén Sánchez Antuña («Dos visiones asturianes de les nueves tecnoloxíes»), Elías Veiga («Robinson astur»), Alberto Álvarez Peña («Mitos de Xixón»), Xavier Frías Conde («Nel país de la borrina (poesía galesa contemporania)»), Adolfo Camilo Díaz («Khaos»), José Luis Rendueles («Ferruñu» y «Los meyores cuentos del mundu y otres proses mongoles») o Cristina Muñiz Martín («Kárias») son dellos de los autores que van pasar pel Antiguu Institutu pa presentar les sos últimes creaciones. Tamién va falase nos alcuentros de los «Cuentos completos» d'Eva González (que va recordar el so fíu, el tamién escritor Roberto González-Quevedo), de los «Escritos Gijoneses» de Luciano Castañón (que va presentar Milio Rodríguez Cueto) o del llanzamientu d'equí a poco de la obra «Asturies cuenta... (...y naide nun escucha...)», una antoloxía puesta en marcha por Suburbia Ediciones onde dellos escritores bien representativos de la lliteratura asturiana d'anguaño dan les sos visiones del pasáu, el presente y el futuru d'esta tierra.

Tamién va haber tiempu en L'Arribada pa facer alcordanza de la revista Orbayando (nun actu que va cuntar cola presencia de Xicu Monteserín, Juan Bonifacio Lorenzo Benavente, Humberto Gonzali, Inaciu Llope y Antón García), facer un repás pelos blogues qu'usen l'asturianu como llingua vehicular -ente los que destaquen los de Xandru Fernández («In Taberna Quando Sumus»), Iris Díaz Trancho («Dende'l tueru»), Ricardo Candás («La esfoyaza») o Xulio Nel Fueyo («Trayasgaya»)-, glosar les lleendes artúriques o averase a delles obres clásiques del cine de terror.

La poesía tamién va tener el so espaciu. José Luis Argüelles y Pablo Texón van pasar peles xornaes pa facer una llectura de los sos poemes, y na xornada de pieslle va celebrase un festival de poesía que va consistir na llectura de poemes de Lourdes Álvarez, Xuan Bello, Inaciu Llope, Roberto González-Quevedo, Ángel González, Alfredo Álvarez de Ponticella y María José Fraga.

L'apartáu musical va tar protagonizáu por Dani García de la Cuesta, A La Gueta La Runa, Mestura y Kadarma. Tamién va haber un recital de Milio'l del Nido, amás de dar a conocer el ganador o ganadora de la segunda edición del premiu Timón, que l'añu pasáu foi pa la escritora Nené Losada Rico.

(de Les Noticies, 04-09-2008)