ENRIQUE CARBALLEIRA

La escritora corverana Cristina Muñiz ta faciéndose con un bon requexu nos estantes de les llibreríes asturianes, gracies a la so capacidá pa encarar la fueya en blancu y completar trabayos narrativos. Autora de cuentos, novela, monólogos, teatru y guiones radiofónicos, presenta estos díes dos nueves publicaciones: per un llau la novela 'Ventiocho díes' y per otru la recopilación de cuentos 'Karias'.

Viendo los sos últimos trabayos publicaos, paez usté una autora que nun lo pasa mal a la hora d'encarar nuevos proyeutos...
La verdá ye qu'escribo bastante. Va unos seis años entamé a tener ciertu tiempu llibre por primer vez na vida y diome por aprovechalu faciendo dalgo que tenía pendiente; escribir. Dende entós escribo toos o cuasi tolos díes.

¿Cómo entamó'l so interés pola narrativa?
Esi interés bien de siempre, de la gociada de la llectura de los primeros cuentos, de los tebeos, más tarde de los llibros. Pienso que'l gustu pola llectura ye dalgo colo que se naz, un daqué que tienes dientro y que, pasu ente pasu, va medrando y llevate a pensar en ponete a escribir, a tentar de crear les tos propies histories.

'Ente muyeres' ye un llibru que recueye escritos humorísticos fechos por muyeres, ¿hai interés en reivindicar un xenero tradicionalmente mui d'homes?
Siempre que se fai dalgo a contra corriente hai un aquel de reivindicación, anque yo entamé a escribir monólogos ensin cuntar con que me metía nun mundu d'homes. Sicasí, la idea de ser arte y parte d'un llibru escritu por muyeres qu'entra nun tarrén, hasta agora, acutáu polos homes, préstame enforma.

¿Cree que pue haber diferencies ente los monólogos escritos por homes o por muyeres?
Anguaño nun me paez qu'haya una diferencia valoratible ente los monólogos escritos por homes o muyeres a nun ser polos temes que se traten. Nesti casu la muyer ye más reivindicativa y trata más temes sociales o aquellos qu'afeuten a la so propia condición femenina.

¿Presta-y facer narrativa d'humor?
Préstame pola vida porque ye una faceta mía que nin yo mesma conocía. Soi una persona seria, a la que-y cuesta soltar la risa y nestes que me pongo y entamen a salime coses d'humor. La primer sorprendía fui yo. Y qué dicir de los que me conocen de siempre. Y una de les mayores satisfaiciones que me da la escritura ye'l pensar que soi quien a qu'otres persones escaezan por momentos los sos problemes y pasen un ratín prestosu colos mios testos d'humor.

Tamién presenta un llibru de relatos y una novela, ¿en qué formatu se siente más cómoda?
Préstame más escribir cuentos anque yá toi con otra novela.

¿En 'Karias' sigue la llinia de los dos anteriores volúmenes de cuentos qu'espublizó?
Los tres llibros de cuentos que teo espublizaos siguen la mesma llinia, que ye tanto como dicir que nun siguen nenguna. El llector que s'avere a estos llibros va topar con cuentos sentimentales, d'humor, tristes, fantásticos, críticos, irónicos, tráxicos, de mieu. ye dicir, cuentos de temática y estilos estremaos.

¿Como llectora tien dalgún xéneru en particular que-y preste?
Novela, cuentos, teatru, menos la poesía y nada los ensayos. En cuantes a temes y autores toco un poco de too, según los ánimos y el tiempu que tenga.

¿Escribir n'asturianu tamién tien daqué reivindicativu?
Teniendo en cuenta que ye escribir nuna llingua qu'oficialmente nun esiste, o tien un daqué reivindicativu o nun tien sentíu. Escribir n'asturiano, polo menos pa min, ye caltener la memoria d'una llingua que falaron y me dexaron d'herencia los mios mayores y que, pasu ente pasu, ta sufriendo una perda de tresmisión familiar y un fuerte retrocesu social.

Paez que se pierde la posibilidá de la oficialidá na reforma del estatutu...
Nun sé nin cómo toi. Lo único que sé ye que los asturianos somos una especie en peligru d'estinción, una especie a estudiar por sicólogos, sociólogos, arqueólogos. y tolos 'logos' que queden perehí, porque ¿cómo se pue esplicar qu'un pueblu dexe morrer la so propia llingua? Y nun echemos tola culpa a los políticos, que ta claro que son los principales responsables, pero ¿ónde ta'l pueblu asturianu glayando con toles sos fuercies pola reconocencia de la so llingua?

¿Qué proyeutos tien en cartera?
Anguaño ando escribiendo guiones pal programa de radio de la RPA 'Nomes d'Asturies' y monólogos d'humor pa 'La risión' de la TPA. Arriendes d'ello escribo dalgún qu'otru relatu, toi con una obra de teatru y documentándome y montando la cadarma pa una novela nueva. Por embargu, estos proyectos puen camudar de sópitu al llegame la idea pa facer cualesquier otra cosa y dexalo too y poneme a ello.

(d'El Comercio, 02-09-2008)