IVÁN G. FERNÁNDEZ

El director xeneral de Polítiques Educatives y Ordenación académica, Luis Enrique García-Riestra Gómez, presentó la pasada selmana nel Pabellón d'Asturies en FIDMA la nueva ordenación y currículu de Bachilleratu que va entrar en vigor el próximu cursu 2008-2009.

El Bachilleratu forma parte de la educación secundaria post obligatoria y tien como finalidá «proporcionar» al alumnáu que la cursa «formación, madurez intelectual y humana, y una capacidá p'adquirir otros saberes y habilidaes» que va permitir a los escolares preparase pa desempeñar funciones de mayor complexidá y incorporase a la vida activa con responsabilidá y competencia.

Nesta etapa va haber tres modalidaes de Bachilleratu: Ciencies y Tecnoloxía, Humanidaes y Ciencies Sociales, y Artes; esti últimu va organizase en dos víes, una referida a Artes plástiques y la otra a Artes escéniques, música y danza. El númberu de materies ye un total de 19 que los alumnos van estudiar a lo llargo de dos cursos. Esta etapa educativa va tar compuesta por cinco materies comunes nel primer cursu, ente elles, Filosofía y Ciudadanía o Llingua Castellana y Lliteratura I, y cuatro nel segundu cursu, como por exemplu Historia d'España o Llingua Extranxera II. Amás, introduzse como novedá l'asignatura de Ciencies pal Mundu Contemporáneu, que tolos escolares van cursar yá dende primeru. Con esta materia lo que se quier ye que los escolares tengan abondos conocimientos pa tomar decisiones sobre temes científicos y técnicos pa dir hacia un futuru sostenible pa la humanidá.

En cuantes a materies de modalidá, los alumnos van tener qu'estudiar un mínimu de seis asignatures, trés en cada ún de los dos cursos, de les que al menos cinco han de ser de la modalidá del Bachilleratu escoyida. Van ufiertase un total de 39 modalidaes, ente elles, Dibuxu artísticu, Historia de la música y la danza, Economía...

En cuantes a les materies optatives cada alumnu va poder escoyer una materia nel primer cursu y otra nel segundu, d'ente toles qu'ufra'l centru educativu. Nesti marcu, l'asignatura de Llingua asturiana y gallego-asturianu, va tener que siguir compitiendo con otres asignatures como Segunda llingua extranxera, Tecnoloxíes de la Información y la Comunicación o Proyectu d'Investigación Integráu, asina como con otres asignatures optatives que'l propiu centru educativu pueda ufiertar. Ye menester dicir que'l númberu de escolares que se matriculen en Llingua asturana y gallego-asturianu crez añu trés d'añu pesie a esta competencia, como asina lo demuetren les cifres. El númberu d'alumnos qu'escoyeron asturianu aumentó del cursu 2006-2007 al 2007-2008 en cerca de 600 alumnos en tola Secundaria.

Otra manera, l'asignatura de Relixón tamién ye materia optativa en primeru y segundu de Bachilleratu. Asina los alumnos mayores d'edá o los proxenitores o persones qu'exerzan la tutoría llegal de menores d'edá, van poder manifestar, enantes del iniciu del cursu escolar, la so voluntá de recibir o non enseñances relixoses. Los centros educativos van cuntar coles midíes organizatives necesaries pa proporcionar y garantizar la debida atención a los alumnos que nun escoyeren esti tipu d'enseñances. Nesti sen los centros escolares van poder organizase como ellos mesmos decidan.

(de Les Noticies, 28-08-2008)