XOSÉ LLUÍS CAMPAL FERNÁNDEZ

Corría l'añu 1920 cuando Pachu'l Péritu abordó, nel romance 'El pleitu de los barberos' -viera la lluz nel exemplar del 14 de marzu de la revista 'Asturias', de L'Habana- un problema llaboral rellacionáu con un gremiu nel que tenía muncho que dicir l'autor xixonés, pos trabayó de peluqueru. Too ello desplica'l descursu qu'ocupa la mayor parte de la poesía -y pal qu'emplega'l recursu del suañu- y que xira alredor de les ventaxes y entorgos d'actualizar sueldos ente los oficiales de barbería pa vivir con desfuegu, y onde echa unes cuentes nes que de xuro'l versificador punxo a referver el so calletre.

El testu que güei recuperamos, y qu'espeya a cómo taben entós n'Asturies los cortes de pelo y l'afeitáu, amuesa'l puxu de les custiones sociales ente los poetes bables:

Por non faceme la barba,
ni 'ntrometeme 'nel pleitu,
el domingu a la tardica
foi al llagarón de Mersu.
Como yera abondo lloñe,
llevé fiambre d'entrepuestu,
y ansí tevi que morder
mientres remeyé'l gargüelu.
Ayudáram'a 'scanciar
un oficial de barberu,
que como taba de fuelga
tomamos entrambos fuelgu.
Ente plática i tayaes,
trincar, rincamos d'afechu,
y cuando me vio peneque,
el utru marchó pal Centru.
Yo non sé per ú tiré
col bandullu bien repletu;
pero paeme que cayí
e'nes garres de Morféu.
Tal cri que me llevantaba
y 'che andar al endefechu
per atayos i bardiales
fasta Xixón en un creu.
Pero quedé plasmayáu:
vi de xente un formigueru,
y homes formaos en ringla
pa que yos tomen el pelu.
Diben faitando un per un
los oficiales del gremiu,
mentanto que los motiles
ponín barbes a remueyu.
Sin saber cómo nin cuándo,
vime a la puerte del Centru,
y por custión de xornal
taben allí descutiendu.
Ocho pesetes i media
pidín angunos de sueldu;
otros siete, i otros cinco,
y ocho hores diaries d'esmenu.
Un que me viera 'tisbando
mandóme pasar pa 'dientru,
y voció'n plena 'samblea:
¡Que fale aquí Pachu'l Péritu!
«-Agora, señores fígaros,
voi a davos un conseyu:
si faitáis por cuenta propia
lleváis yá perdidu'l pleitu.
El más llistu de vosotros
podrá sacar, yá lo creu,
a dos pesetes por hora,
y ainda, pero non y'esu:
dos por ocho deciséis,
la metá ye del Mayestru,
que pon xabón i prefumes,
casa 'moblada i preséu.
N'ocho hores, ocho pesetes
puede ganar el más diestru;
pero toos los dis no hai feria,
y aquí vos verná'l discuentu.
Tres feries a la semana
teneréis en mió conceutu,
por ocho son venticuatru
pesetes, i con el restu
que son cuatro medies feries
a cuatru, sumái pa lluegu:
venticuatru i deciséis
son cuarenta, yá ta güenu
el xornal de la semana;
¿y a cómo salen? A pesu
con dos riales más o menos
al día, i en el conceyu
hai poques peluquerís
que den abastu par'ellu.
Pos baxando la 'tiqueta
pe les barberís del mediu,
dond'hai una mala feria,
y les seis de sestaferiu:
¡Oficiales de segunda
y tercera, no hai derechu
a pidir peres al olmu,
pos tamién come'l Mayestru!
Son tres o cuatro hores diaries
lo que trabayáis, el restu,
ente fumar i lleer,
y falar, no hai escalientu.
Conque podéis conformavos
pa que remate aquí'l pleitu,
con tres o cuatro pesetes,
segundu gradu i terceru.
Bien conozco que ye pocu
pa vivir en isti tiempu;
pos que golvian les propines
a sirvir de suplementu».
Nesto, un motil que 'cababa
de desollar a un arrieru
sobióse 'nriba d'un bancu
sólo pa gritar: ¡protestu!
Utru de la Diretive
mirábame satisfechu,
y dixo: -quea 'probao,
pero col venti por cientu.
Y en deber de les propines
suba la cota'l Mayestru:
a ochenta céntimos barba,
y a peseta barba i pelu.
La xente salió a 'mburriones,
yo, a carrenderes pel pueblu:
disperté pámpana 'riba
metanos el prau fumeru.

(d'El Comercio, 02-09-2008)