Les venticuatro editoriales asturianes agrupaes nel Gremiu d'Editores d'Asturies va celebrar a partir d'esti vienres 22, la VI edición del Salón del Llibru Asturianu que tará allugada na céntrica cai de Francisco Tomás y Valiente, xunta a la plaza'l parchís, en Xixón.
La inauguración tendrá llugar el mesmu vienres a les 19.30 hores y cuntará cola presencia de Consuelo Vega, direutora xeneral de Cultura y Política Llingüística; Justo Vilabrille, conceyal de Cultura del Ayuntamientu de Xixón; y Pilar González Lafita, direutora de la Fundación Municipal de Cultura de Xixón; asina como dellos representantes de les editoriales asturianes.

La carpa, de cien metros cuadraos, siguirá abierta al públicu a lo llargo de diez díes, hasta'l domingu 31 d'agostu y los horarios d'apertura al públicu van ser, de llunes a vienres, de 11 a 14 y de 17 a 21 hores, y sábados y domingos, de 11.30 a 14.30 y de 16.30 a 21.30 hores.

El Salón del Llibru Asturianu acueye los más de los fondos bibliográficos de les editoriales asturianes p'averalu al públicu asturianu y al foriatu que pasa'l branu n'Asturies.

El Gremiu d'Editores d'Asturies quier, al traviés de la celebración d'esti Salón del Llibru Asturianu, dar a conocer al públicu la bayura y calidá del llibru asturianu, non sólo de temática asturiana o escrito n'asturianu, sinón nel sentíu ampliu de lo editao n'Asturies.

Durante los diez díes de celebración del VI Salón del Llibru Asturianu, el Gremiu d'Editores d'Asturies tien programaes una serie d'actividaes como presentaciones y robles de llibros d'autores asturianos, como Alberto Álvarez Peña, Javier García Cellino, Xuan Xosé Sánchez Vicente, Esther García López, Miguel Rojo, Armando Murias, Aurora García Rivas y Aurelio González-Ovies, ente otros.

Los neños tamién tendrán un espaciu importante nel Salón, porque a lo llargo la selmana van a organizase cuentacuentos y presentaciones de llibros pa la reciella dende los tres años.

(d'Asturies.com, 21-08-2008)