ENRIQUE CARBALLEIRA

L'Academia de la Llingua Asturiana finó esta fin de selmana una nueva edición de los cursos de branu que tolos años se desendolquen na Escuela Hogar de Santantolín d'Ibias. Nesta edición ufiertóse'l Cursu Elemental y Avanzáu de Llingua Asturiana, cursos d'Afondamientu Cultural y Llingüísticu y la segunda fase del cursu de Capacitación en Gallego Asturiano. Trátase d'un programa formativu que tien reconocencia oficial per parte de la Conseyería d'Educación del Principáu d'Asturies. Xosé Antón González Riaño, profesor de la Universidá d'Uviéu y miembru de l'Academia, dirixe dende fai ocho años estos cursos.

¿Hubo una bona participación esti añu?
Teniendo en cuenta la baxada del númberu d'estudiantes universitarios y de cursos de formación que fai la propia Universidá d'Uviéu, creo que los cursos de l'Academia mantiénense nun nivel más qu'aceutable. Ente tolos programes formativos cuntamos unos cien alumnos. De toes formes, ye una cifra que pue enanchase y tamos seguros que pa otres ediciones vamos superala ampliamente.

¿Habrá meyores nel futuru?
Tenemos perspectives de facer sobre too nuevos cursos d'afondamientu y facilitar la formación d'adultos, un tema estratéxicu pa nosotros. Creemos que se pue siguir medrando. Por algo escoyemos la escuela hogar de Santantolín d'Ibias, que ye la de mayor capacidá de toa Asturies.

¿Qué cursos son los que tienen más demanda?
Por razones organizatives, esti añu ufiertamos el cursu, tradicional yá, de capacitación pa la traducción y el d'internet y nueves tecnoloxíes aplicaes al ámbitu de la educación. Tantu un cursu como otru superaron lo previsto. Queremos facelos con un calter mui d'especialización. Nos dos casos tuvimos que pasar de les cifres d'alumnos previstes.

Dende l'Academia ta trabayándose precisamente l'usu d'estes nueves tecnoloxíes...
Siempre fueron una preocupación pa nosotros. L'Academia tien un conveniu col colexu d'inxenieros informáticos y acabamos de sacar en comuña un cartafueyu normativu sobre la terminoloxía d'internet. Nel cursu de branu qu'agora finamos participaron tamién dalgunos d'estos informáticos. Ye una llinia de trabayu que consideramos importante.

Tamién hai una llarga nómina de profesores nestos cursos...
Ye daqué que siempre dicimos na presentación de los cursos: cuntamos colos mayores especialistes. L'Academia, y yo mesmu como direutor, podemos presumir de tener el meyor profesoráu. Son profesores de la propia universidá, que pertenecen a la institución, o profesores de llingua asturiana en los distintos niveles educativos; doctores, investigadores... Cuntar con esta plantía de profesores ye una garantía d'ésitu nos cursos.

¿Cómo ye un día normal nestos cursos?
Tolos díes hai seis hores de clas. Entamen a les nueve y media de la mañana, finen a les dos y pola tarde de seis a ocho. L'asistencia ye siempre obligatoria. Al final los alumnos tienen que superar una preba escrita.

Tamién son importantes les actividaes complementaries...
Sí, tuvimos una conferencia de Xulio Elipe, del grupu Dixebra, que faló sobre la historia y perspectives de la música nel procesu de recuperación llingüística. Tamién tuvo Berta Piñán, que faló sobre la lliteratura n'asturiano y sobre la so obra poética. Organizamos escursiones, fiestes populares, una actuación abierta a tol pueblu de Chus Pedro, Nuberu... Ye una dinámica mui completa porque la xente participa na vida académica y tamién nestes actividaes complementaries.

Los cursos tamién son un llabor importante de recuperación y espardimientu de la Llingua nun momentu nel que paez que l'asturianu ta sufriendo dellos ataques...
Sí, la verdá ye que la recuperación llingüística nestos últimos meses sufrió la incomprensión de sectores claves. Los estudios de filoloxía na facultá tienen que reconducise y tovía hai la oportunidá d'iguar en setiembre'l planteamientu al que llegaron el PP y PSOE na reforma del estatutu, daqué que me preocupa fondamente. Por eso, nos cursos, ye importante que los alumnos depriendan la llingua y a querela, pero tamién que tengan una imaxe de qué ye lo que se pretende cola recuperación llingüística n'Asturies. Ye importante tener un alumnáu mui estremáu -del ámbitu científicu, humanísticu, sociolóxicu-, porque se cumple l'oxetivu d'allega-yos esi conocimientu. Tamos especialmente contentos, porque de fecho, munchos de los alumnos que faen un cursu con nos, llueu repiten. Ye una amuesa de lo que facemos equí.

(d'El Comercio, 19-08-2008)