El CAO sigue colos sos trabayos de reivindicación, que tienen por oxetivu que la oficialidá de la llingua asturiana apareza recoyida nel nuevu Estatutu d'Autonomía. Decepcionaos cola «reculada del PP», repróchen-y a los dos partíos mayoritarios una redacción «que nun recueye'l sentir y la opinión de munchos asturianos». Fernando Ornosa, portavoz d'esta plataforma qu'axunta a mui bien dellos partíos políticos, sindicatos, asociaciones culturales y sociales, redefine nesta entrevista l'escenariu y llama a la movilización de «tolos que quieren ver garantizada la sobrevivencia de la llingua asturiana».

PSOE y PP yá alcordaron un estatutu qu'esclúi la oficialidá. ¿Qué análisis fai el CAO d'esta situación?
Lo primero de too ye denunciar la situación poco democrática n'Asturies, una situación que nun se da n'otres partes del Estáu. Esta escepcionalidá, desgraciadamente, condena a la llingua asturiana a una precariedá que nada nun tien que ver colos índices de promoción que tienen otres llingües del Estáu. Esta escepcionalidá llingüística asitia tanto al PP como al PSOE nun discursu contradictoriu colo que tán defendiendo n'otres comunidaes. Situaciones como les que defende'l PP en Valencia o el PSOE en toles comunidaes. Neses comunidaes el PSOE y el PP nunca nun falen d'imposición, esi discursu dase equí namás. Había que preguntá-yos porqué equí falen d'imposición onde n'otros llaos ven simplemente reconocencia de derechos; pareznos mui grave que se plantee esta escepcionalidá frutu de la so contradicción.

¿Dan por fechu yá que l'Estatutu nun va recoyer la oficialidá?
Non tal. Ye más, el CAO fai un llamamientu a tol asturianismu a la movilización, a que se demuestre (n'actos públicos, el prensa...) qu'hai muncha xente que defende la oficialización del asturianu. Quieren facenos creer que ta tol pescáu vendío, pero nun ye verdá. Pa empenzar, el testu esi que consensuaron PP y PSOE nun define al asturianu y al gallegu-asturianu de nenguna manera, diz que son «patrimoniu llingüísticu» a cencielles ensin definilos como lo que son: les dos llingües tradicionales d'Asturies. Esi testu que consensuaron nun sé si finalmente va recoyer la oficialidá, pero duldo que nun vaiga sufrir variaciones. Ente otres, tien qu'enriquecese cola definición del asturianu como llingua, puesto qu'hai una Academia de la Llingua, hai una asignatura de llingua asturiana, los estatutos de la universidá falen de llingua asturiana, la Llei d'Usu con esi nome la reconoz... Hai qu'esixí-yos la definición. Si ye llingua, que lo ye, eso tien implicaciones xurídiques que pasen pela oficialidá.

¿Qué tien preparao'l CAO d'equí a ochobre?
El CAO, coincidiendo col 8 de setiembre, quier publicar nos principales medios de comunicación d'Asturies el testu que defende pa la reforma estatutaria y l'apoyu de munches firmes d'apoyu. Trátase d'una especie de manifiestu. Vamos tar presentes nel Día d'Asturies demandando la oficialiá. Siguimos cola campaña «Doi la cara...», que yá tien más de cinco mil apoyos, y tamos grabando vidios de xente a favor de la oficialidá, que se presentarán na rede y en conxuntu. Tamién tamos preparando una campaña de spots publicitarios na radio Trátase de cuñes curties con opiniones de xente conocío a favor de la oficialidá. Nesti momentu nun descartamos facer una gran manifestación que se piensa que se va facer pa ochobre. Nun se puede escluir a una parte mui importante de la sociedá asturiana de la redacción d'esti Estatutu.