El Centru de Cultura La Reflexón del barriu xixonés de La Calzada entama un cursu de llingua asturiana gratuítu al que se puen apuntar toles persones interesaes na llingua patrimonial d'Asturies. Los cursos entamarán esti miércoles 6 d'agostu del 2006 a partir de les 5 de la tarde, onde tolos interesaos puen acudir y participar nesi mesmu momentu.

El cursu tendrá llugar tolos miércoles nel propiu Centru de Cultura La Reflexón, un nuevu y dinámicu centru de cultura popular, que pretende ser una fábrica del activismu cultural asturianu, vanguardista y abiertu a les nueves formes d'espresión cultural y artística. Amás de los cursos y talleres de llingua asturiana tán previstes abondes actividaes culturales y participatives en munches xeres artístiques y a les que toos tán convidaos a participar y collaborar activamente. El Centru de Cultura La Reflexón pretende servir asina de colchón de protección pa toes aquelles manifestaciones artístiques que quieran medrar y surdir al marxe de los filos y tenta-culos del poder y de la cultura políticamente dirixida y ser una fábrica de producción de la cultura abierta, popular y dafecho asturiana. El Centru La Reflexón tien la so sede na Avenida del Petruciu d'Asturies 19, en pasando la ponte de Carlos Marx, nel barriu xixonés de La Calzada. El Centru naz col enfotu crear un espaciu onde axuntar a la xente alrodiu d’un proyectu tresformador, un grupu heteroxéneu de persones deciden refacer un vieyu edificiu abandonáu, asitiáu nel barriu xixonés de La Calzada. Nagüen por facer d’esti llugar un Centru Social Autoxestionáu onde desendolcar la xera tresformadora que caracteriza a los CSOA. Nagüen por plantegar y crear alternatives al sistema social, económicu y cultural impuestu, altraviés del fomentu la cultura alternativa, la formación crítica y la defensa d’unos valores igualitarios y solidarios. ün de los fines del centru ye trabayar pola creación d’un espaciu constructivu y horizontal, onde axuntar baxo un mesmu teitu a persones y colectivos d’estremaes sensibilidaes que tengan l’oxetivu común de construyir un mundu meyor.

(de Glayíu, 05-08-2008)