Depués d'un añu como estudiante del programa universitariu Erasmus n'Uviéu, Sarah James volvió a Asturies p'afondar nel conocimientu del país centrándose na so música, la llingua asturiana y les sos conexones col movimientu nacionalista. «Quiero tratar tanto la parte cultural, como la política y la sociollingüística», explicaba la estudiante d'Hispániques en Glasgow (Escocia), nuna visita fecha va poco a Asturies pa recoyer información.

Nel apartáu musical, la investigadora va atender tanto a la música tradicional como a les formes d'expresión más novedoses, teniendo como exa l'idioma col qu'esa música s'expresa, al valorar «la importancia de la relación ente la llingua y la música». Pa eso Sarah James ta atropando les opiniones de della xente que trabaya nel ámbitu de la música y de la reivindicación llingüística, y informándose de la situación actual gracies a publicaciones d'investigación. La so intención ye que l'estudiu tea acabáu n'abril de 2009.

(de Les Noticies, 24-07-2008)