El Conceyu Abiertu pola Oficialidá (CAO) convoca a concentrase'l llunes 14 de xunetu, a les 10:45 hores, delantre de la Xunta Xeneral del Principáu. Esta acción ye una demostración de que'l Conceyu Abiertu va siguir reclamando pal Estatutu la inclusión de la oficialidá de la llingua asturiana mientres duren les reuniones de la ponencia estatutaria y siempre que faga falta defender un ameyoramientu del marcu llegal de forma que se reconozan los derechos llingüísticos de los ciudadanos.

Como vien siendo habitual nes concentraciones, representantes de la plataforma cívica van facer valoraciones sobre los trabayos de la ponencia y les propuestes pa la redacción del Artículu 4 que se tán baraxando.

El CAO rechazó'l xueves 10 de xunetu, por mediu d'un comunicaú, la propuesta del grupu parlamentariu socialista -apoyada depués pol PP- pal Artículu 4, onde se-yos niega al asturianu y al gallegu-asturianu l'estatus de llingües oficiales. Nel mesmu comunicáu, el Conceyu Abiertu llama a la sociedá asturiana a «denunciar públicamente y impedir l'aprobación d'esta redacción del artículu 4 que vulnera un derechu fundamental y ruempe'l principiu d'igualdá al impedir que'l Estatutu seya fonte de derechos».

(de Les Noticies, 11-07-2008)