Gómez Ojea: «El que nunos sitios haya llingües oficiales y n'otros non ye dalgo increíble»

«Una vez más ye un pasu atrás. Yera dalgo esperable y paezme absurdo. Porque si delles persones anden faciendo manifiestos en favor de qu'España ye la cuna del español, nun entiendo por qué Asturies nun lo ye del asturianu. D'otra manera, esi xueguín que se traen unos y otros de que n'unos sitios sí hai llingúes cooficiales y n'otros non ye dalgo increible», opina la escritora Carmen Gómez Ojea al non reconocimientu de la oficialidá del asturianu na reforma del Estatutu.

Jordi Llavina: «la negación de la oficialidá ye propio de paletos faltos de llectura y mundu»

Les reacciones a la negativa por parte del PP y el PSOE a da-yos al asturianu y el gallego-asturianu l'estatus de llingües oficiales lleguen tanto de dientro como de fuera del país. Asina, l'escritor y críticu catalán Jordi Llavina Murgadas, comenta que «dende Cataluña faise poco menos qu'increíble, por nun dicir alucinante, lo que ta pasando dende hai décades cola llingua asturiana. Quiciabes un axetivu más xustu para describir la situación yera "obsceno"».

Sigue l'escritor catalán, bon conocedor de la lliteratura asturiana, diciendo: «Nun momentu nel qu'hai qu'engarrase a lo fato contra los setosos españolistes qu'intenten borrar del mapa del Estado cualquier llingua que nun seya la castellana (común, al dicir de los sos manifiestos), constatar que, nel nome de nun se sabe qué, l'asturianu tovía nun gocia de la oficialidá elemental, de carta de naturaleza nel so propiu país, devién casi nuna broma de mal gustu».

«Otra vez van confundise los términos: ¿sedrá dalguién capaz d'apelar a los derechos de los ciudadanos y non a los de los territorios? ¿Ye que nun existe una cantidad bien grande de ciudadanos d'Asturies que tienen l'asturianu como llingua propia? ¿Nun merecen ellos que se los tenga en cuenta? ¿Nun ye ésta una prioridá absoluta? Desfachatez pura, imaxe del provincianismu más tremendosu. Mui propio de paletos faltos de llectura y mundu», conclúi Llavina.

Valledor: «Esta ye la última gota d'un Estatutu amañáu ente'l PSOE y el PP»

«Ye la última gota de lo que vien siendo un Estatutu amañáu ente'l PSOE y el PP». Esta ye la primera impresión del diputáu d'IX-Bloque-LV Francisco Javier García Valledor énte la redacción propuesta pol PSOE pal artículu 4 de la máxima norma autonómica tocántenes a la llingua asturiana y el gallego-asturianu. «Tengo mieu de qu'esta redacción suponga un retrocesu», valora Valledor, qu'amiesta que «tolo que nun sía un reconocimientu de la oficialidá nun se puede asumir». Nesti sen, el diputáu de la coalición d'esquierdes asegura que la propuesta recíbese con «rabia, indignación y impotencia».

La impotencia deriva, d'una parte, del alcuerdu que'l PP amosó a esti textu, y d'otra a la dinámica siguida a lo llargo de tola reforma estatutaria de pidir mayoríes de dos tercios pa l'aprobación de diferentes lleis, incluida la del asturianu. «Esta mayoría ta penriba incluso de los tres quintos que se requieren p'aprobar l'Estatutu y respuende a un pactu del "PPOE" pa que l'Asturies qu'otros queremos sía imposible en bien de tiempu», explica García Valledor, que llamenta qu'«esti réxime va durar munchos años». Y ye que con estes mayoríes ciárrase'l pasu a la capacidá d'intervención d'IX-Bloque-LV o de cualquier otra fuerza minoritaria qu'entre nel futuru na Xunta Xeneral.

No que ye'l conxuntu de la reforma estatutaria, el diputáu de la coalición califícala de «retrocesu democráticu sin precedentes n'Asturies», al empar qu'adelanta que, al so xuiciu, el conceyu que se celebre'l próximu llunes de la ponencia estatutaria va ser «el mesmu paripé del PSOE y el PP que vien siendo tol procesu».

Unidá califica d'«insultu a los asturianos» l'alcuerdu ente'l PSOE y el PP sobre la llingua

La Xunta Executiva d'Unidá, énte les noticies del día de güei qu'apunten a «les prieses inusitaes» por parte del PSOE y del PP pa ciarrar delles de les cuestiones más polémiques de la negociación política de la reforma del Estatutu, valora nun comunicáu «les consecuencies negatives» d'ésta pa la sociedá asturiana.

Faustino Zapico, portavoz de la federación, afirmó que dende Unidá «vemos con gran preocupación la negociación ente PSOE y PP» porque, otra vuelta, «constatamos que nun hai interés nengún por elevar la calidá de vida de la ciudadanía o solucionar problemes enquistaos dende va trenta años, como'l de la llingua asturiana».

Según Zapico, lo que yá se preveía insuficiente abondo «ta convirtiéndose nun auténticu repartu del botín» nel que PSOE y PP «cambien cromos mientres xueguen col futuru del país» al traviés d'ocurrencies «grotesques, como'l términu rexón europea». Amás, el portavoz de la coalición señaló que, dende Unidá, «pareznos especialmente obscena la postura del PP porque tuvo engañando miserablemente al movimientu de reivindicación llingüística» al dar a entender que «podía aceptar una oficialidá edulcorada», cuando'l so planteamientu ye «igual d'etnocida que'l del PSOE, porque ensin oficialidá condénase a muerte a cortu plazu a la llingua asturiana».

D'otra parte, dende esta formación, afírmase que «llevamos meses asistiendo a una farsa na que dos partíos que nun tienen interés nel procesu faen creyer que pacten una reforma qu'en realidá vien impuesta poles dinámiques estatales» y, d'esta manera, lo que «podía suponer una oportunidá pa iguar a Asturies con otros territorios, garra unos tintes d'estafa cuando se refuga de forma explícita a ello».

La XDPLLA diz que'l PSOE y el PP «punxéronse d'alcuerdu p'acabar cola llingua asturiana»

La Xunta pola Defensa de la Llingua Asturiana (XDLLA) ye mui crítica cola propuesta presentada pola FSA-PSOE pa la redacción del artículu 4 sobre la llingua asturiana que, de mano, contó col preste del PP, lo que según la organización ye una amuesa del «alcuerdu» de dambes dos organizaciones «p'acabar cola llingua asturiana». Pa la organización en defensa l'idioma esti textu ye «más de lo mesmo, pero adornao. Fabaraca, pero con muncha lliteratura. En resumíes cuentes, que d'oficialidá nada, qu'eso ye pa los ciudadanos y les llingües de primera, non p'Asturies».

El colectivu acusa a «unos pocos dirixentes de los dos partíos políticos» de determinar «la marxinación legal del asturianu y condenar a muerte al nuestru patrimoniu llingüísticu». La XDLLA tamién censura que se faiga «d'espaldes a la sociedá, robando la posibilidá del debate públicu y incluso dientro de los partíos políticos». Nesti sen, remárcase que se toma esta decisión «primero de que pueda ser debatío pola so propia militancia y a pocos meses y selmanes de celebrar los sos próximos congresos».

L'análisis que fai el colectivu de la redacción propuesta pola FSA-PSOE ye que «de los tres apartaos nos que se reparte l'artículu que proponen, l'apartáu 2 ye una copia del que yá hai. L'apartáu 1 nun diz nada que nun sepamos yá: que l'asturianu y el gallego-asturianu son un patrimoniu y un valor de convivencia. ¿Y eso, pa qué val nel articuláu d'una llei? Más vergüenza produz que, depués de lleer los dos primeros apartaos y ver que nun hai nada nuevo en comparanza col anterior, el terceru fala d'una llei d'usu y promoción, ¡que yá ta aprobada en 1998, pero qu'agora va necesitar 2/3 de
la Xunta Xeneral p'aprobala! Pa esti viaxe nun facía falta tanta albarda», apunta la XDLLA.

Pa la organización «tolo que nun seya garantizar llegalmente los derechos ciudadanos cola oficialidá ye un atentáu que fai recamplar que n'Asturies hai un déficit democráticu intolerable». Afondando nesti argumentu, recuérdase que vivimos nun estáu «onde unos ciudadanos ven reconocida la so llingua de manera oficial y otros, non. Eso ye indefendible pa cualquiera que se diga demócrata y l'aristocracia que manexa los destinos del PSOE y PP n'Asturies va tener qu'explicar por qué lo que val pa los demás nun val pa nós».

Ello ye que la organización en defensa l'idioma alvierte de que «somos munchos miles de ciudadanos conscientes de los nuestros derechos y pueden tar seguros que nun nos vamos dar nunca primero de llogralos».

Cándano: «La FSA va pasar a la historia como la enterradora d'una llingua románica de la Península Ibérica»

El periodista Xuan Cándano principia por esclariar que'l textu que, de momentu, apoyen la FSA-PSOE y el PP, nun lu garra «de sorpresa»: «Los socialistes lleven dende'l principiu de l'autonomía sometiendo al asturianu a una lenta agonía y agora quieren matalu dafechu», expón. Na so opinión, esti partíu «va pasar a la historia como l'enterrador d'una llingua románica de la Península Ibérica».

Por esta razón acusa a los socialistes de ser «sordos y dictadores» y d'«imponenos el monollingüismu n'Asturies», al tiempu qu'añede que «la única obligación ye la d'ellos de forzanos a desaniciar l'asturianu».

Otru de los aspectos que destaca'l periodista ye que se trata d'una decisión de la «cúpula dirixente de la FSA y del Principáu, de media docena de persones fondamente antiasturianes, porque nun se puede ser asturianu y odiar a la llingua propia». Nesti sen, Candano afirma que «fiede muncho'l cinismu d'esta xente. Dicen que van protexer l'asturianu cuando saben perfectamente, y esa ye la so estratexa, que tolos díes pierde falantes por falta de protección legal, de la cooficialidá, y tamién saben que l'asturianu nun aguanta otra reforma estatutaria».

A xuiciu de Xuan Cándano «a los asturianos y a los demócrates que tán a favor de la cooficialidá sin ser falantes d'asturianu yá nun nos queda namás por facer. Frente al totalitarismu llingüísticu nun hai razones nin derechos». La pelota ta agora, según el periodista, nel teyáu de la militancia de la FSA-PSOE «que diz que ta a favor de la llingua. ¿Van siguir ensin salir del armariu nel Congresu de la FSA d'esti mes eses agrupaciones, militantes y hasta dirixentes, como Antonio Trevín, delegáu del Gobiernu?».

El CAO diz que PSOE y PP roblen un alcuerdu pa llevar a l'asturianu a la so desaparición

El Conceyu Abiertu pola Oficialidá (CAO), pente medies d'un comunicáu, declaró que cola propuesta del PSOE, col apoyu del PP, sobre l'articulu cuartu «ta negándose un derechu civil» y «reconociendo un patrimoniu pero condergándolu a la clandestinidá, al impidir que seya llegal xurídicamente y invisible» por nun ser oficial nel marcu español y européu.

Dixo del textu que presentara'l PSOE que «pon al asturianu fuera del patrimoniu llingüísticu del Estáu, al non facelu cooficial a la escontra de lo que defendió pa les llingües del estáu nel so Congresu Federal». Y que nesi testu, el PSOE fala del asturianu como un «valor social de respeto, convivencia y entendimientu». Lo que nun diz el testu, según el CAO, ye que «la propuesta socialista nun respeta a los falantes d'asturianu, impide la convivencia de la diversidá llingüística asturiana y afala'l conflictu en cuenta de solucionalu».

El colectivu de reivindicación llingüística, considera esti fechu como un «pasu atrás que pretende arrequexar socialmente a miles de ciudadadanos y ciudadanes, ufiertando la peor cara que puede ufiertar un país democráticu». Pal CAO, esto «ye discriminación social» y torga'l derechu a la llibertá d'espresión. Amás, consideró qu'esti posicionamientu nun ta consensuao nel másimu órganu del Partíu Popular d'Asturies y que «ye una decisión tomada ensin cosultar al partíu». Consideren esta postura como «contradictoria tamién colo que defiende el PP en Comunidaes como Valencia o Galicia respecto al valencianu o'l gallegu».

Nel comunicáu el CAO llama a la sociedá asturiana a «denunciar públicamente y impedir l'aprobación d'esta redacción del artículu 4 que vulnera un derechu fundamental y ruempe'l principiu d'igualdá impidiendo que'l Estatutu seya fonte de derechos».

Rafael Palacios: «A partir d'equí ábrese otru tipu d'escenariu»

Rafael Palacios, portavoz del Bloque por Asturies, afirma que la propuesta de la FSA respecto al asturianu ye «una irresponsabilidá política gravísima» y «una provocación sin límites», al entender qu'esta redacción supón «dar pasos atrás». Ello ye qu'a xuiciu del dirixente nacionalista «a partir d'equí ábrese otru tipu d'escenariu» que, nes sos palabres, «merez una respuesta adecuada».

L'actitú de la FSA y el PP ye calificada por Palacios de «sinvergüencería política», al incidir en que dambes dos organizaciones son les responsables del futuru de la llingua asturiana y en qu'acaben de dar un «golpe brutal al consensu, al diálogu y la convivencia n'Asturies, sobre too depués de la celebración del Congresu Federal del PSOE, onde que se defendió la riqueza que supón la pluralidá llingüística nel Estáu».

Aparte de la cuestión llingüística, Rafael Palacios remarca que'l non reconocimientu de derechos nel Estatutu y que se ciarre la ponencia con menos competencies que Castiella y Llión o Andalucía ye «riíse de nosotros, ye una burlla a Asturies y a los asturianos, de xente que desprecia a Asturies y a los asturianos».

(de Les Noticies, 10-07-2008)