FERNANDO ORNOSA

El nuevu estatutu d´autonomía d´Asturies que salga de l´actual reforma, tien que servir pa que tolos ciudadanos y ciudadanes que viven na nuestra Comunidá se sientan identificaos con él, un estatutu como fonte de derechos, que garantice los derechos individuales y colectivos. El Conceyu Abiertu pola Oficialidá (CAO), trabaya dende l´añu 2004 col enfotu d´algamar la Oficialidá de la llingua asturiana y del gallego-asturianu nel so ámbitu territorial del Navia-Eo.

Son ya cuasique 300 les entidaes y organizaciones polítiques, sindicales, culturales y sociales, amás de miles de ciudadanos, los que firmen el testu fundacional del CAO, representando a la pluralidá de la sociedá asturiana y que namái busquen un marcu llegal que faiga a l´asturianu llingua oficial y garantice lo que la simple promoción nun ta pudiendo garantizar: la sobrevivencia d´una llingua milenaria que ye patrimoniu común de tolos asturianos y asturianes, lloñe de bandera política denguna y que ye la mayor ayalga que tien el patrimoniu inmaterial del nuestru pueblu.

Nun hai llingües más riques nin más probes, más importantes nin menos importantes, toes son un bien patrimonial que tenemos el deber de protexer. L´asturianu tien que ser como les demás llingües del estáu español porque con otru tratamientu llegal ye invisible y Asturies pierde recursos y presencia nel marcu español y européu y, amás, los partíos mayoritarios tarán dexando d´exercer la so responsabilidá como representantes d´un pueblu y d´una cultura.

D´entrada, pa falar d´esta cuestión, hai qu´afitar que la obligatoriedá de la que fala la Federación Socialista Asturiana (FSA), ye la de nun poder utilizar una llingua propia llibremente nun estáu democráticu nel añu 2008. Un ciudadanu nun puede n´Asturies d´anguaño, usar la so llingua nel ámbitu privao. Nun puede formalizar el so matrimoniu nel Rexistru Civil na llingua na que previamente, con suerte, foi casáu nun Ayuntamientu. Nun puede facer un contratu de compra-venta, la declaración de la renta o un testamentu. La razón ye que la so llingua, l´asturianu, nun ye oficial, nun esiste xurídicamente. Hai déficit democráticu n´Asturies y excepcionalidá llingüística nel marcu de les llingües del estáu español. La voluntáriedá d´utilizar una llingua de contrapón cola obligación de la FSA impidiendo qu´el so usu seya llegal.

Tamién hai que dicir que n´Asturies ta rotu´l principiu d´igualdá de los ciudadanos, tanto´l de los falantes d´asturianu respecto a los de castellanu dientro d´Asturies, como´l de los asturianos respecto a los ciudadanos d´otres comunidaes con llingua propia, que sí tienen reconocíos los sos derechos llingüísticos, cumpliendo lo que diz la Constitución española, habiendo declarao les sos llingües oficiales va más de 25 años. Tampoco tán garantizaes les relaciones cola Alministración del Principáu y Central del estáu.

Facemos un llamáu públicamente al PP pa que cumpla´l so programa electoral y se tengan en cuenta les declaraciones de numberosos y destacaos dirixentes populares a favor de la Oficialidá (los dos Vicepresidentes y el Secretariu Xeneral ente otros). Nun ye suficiente colos bonos xestos, porque agora ye´l momentu y tan llueu, será tarde pa garantizar la sobrevivencia de l´asturianu. Poro, la gran responsabilidá del PP nesta reforma estatutaria. El CAO fai otra vuelta, una llamada al diálogu al PSOE, p´algamar el consensu que solucione esta inxusta situación y pide-y coherencia pa facer lo que diz nel so Congresu y manifiesta públicamente José Blanco, Vicesecretariu del PSOE, cuando defiende les llingües cooficiales y fala de la diversidá llingüística como´l meyor patrimoniu común español. L´asturianu forma parte d´esa diversidá llingüística y lo que se diz en Madrid hai que lo poner en práctica n´Asturies pa nun defraudar a los ciudadanos a los que se gobierna.

Una llingua oficial nun tendría los problemes d´indefensión qu´anguaño ta teniendo la llingua asturiana. Llamamos a la sociedá asturiana a movilizase pa impedir qu´esti Estatutu nun reconoza la oficialidá, denunciándolo públicamente en cualesquier actu y acudiendo a les convocatories de movilización que faiga´l Conceyu nos prósimos meses.

Un pueblu ensin alcordanza nun tien futuru a la llarga y el nuestru necesita tenela y ver que los sos gobernantes nun van tapecer la ilusión de miles d´asturianos que, civilizadamente, piden dende hai décades que la so llingua seya oficial como les demás. Y lo pidimos por: dignidá, respetu, responsabilidá, democracia, pluralidá, derechu, solución, convivencia y consensu; por amor a una llingua falada dende va más de mil años que queremos seguir falando nosotros y los nuestros fíos.

(de La Voz de Asturias, 09-07-2008)