ENRIQUE CARBALLEIRA

La editorial Nueva Celtia acaba espublizar l'últimu llibru del escritor y periodista José María Vega, un garapiellu de testos y poemes que s'alloñen de lo políticamente correctu. Trátase d'un trabayu que ta despertando muncha polémica y hasta acusaciones de racismu y misoxinia hacia l'autor, que lu define como un llibru «de sentimientos non un ensayu».

El llibru yá rescampla pola portada.
La portada tuvo'l so orixe nuna foto que me sacó'l fotógrafu de El Comercio Jesús Díaz, y decidí que tenía qu'apaecer namás qu'en taparrabos. Yera una foto d'antroxu, onde había la intención de representar a una especie n'estinción, l'asturianista. La verdá ye que lo pasamos bien y hubo munches rises el día que la fiximos.

'Desencantu' ye'l títulu, ¿paez qu'a usté tamién lu gana esi desencantu?
Enantes de nada hai que dicir que ye un llibru de sentimientos, non un ensayu. Yo llamaríalo un 'pentimientu', una esbilla de pensamientu y sentíu. Ye productu de los mios 50 años, una edá a la que se llega un pocu desencantáu cola vida y col asturianismu. Vamos dexando coses atrás que yá nun van volver y atopamos que depués de muncho camín, dalgunos de los actos que vinimos faciendo nun valieron pa munchu.

¿Entós, nun cree que la situación de la llingua ye bona?
Peor nun podía ser. Yo nun espero milagros y la llingua creo que los necesitaría. Depués de tantos años ún tien l'enfotu de llibrase d'una llucha pa entamar otres, pero nun hai forma porque les coses siguen mal. Fácense cosiquines y tenemos dalgunos escritores que se consagraron, pero poco más. Tenemos ehí l'exemplu d'estos díes cola facultá de filoloxía o los partíos políticos, con una FSA cerril, un PP que se suma'l manifiestu pola llingua común. Nel estatutu nun cabe la llingua. Creo qu'hai munchos que pueden pensar que si se diera cancha a la llingua peligraría-yos el comederu. Los que tienen el poder nun tan por ella.

Pero, ¿nun cree que se meyoró n'estayes como la escolarización?
La situación tamién ye mui mala, porque la llingua compite nes peores condiciones. La enseñanza p'adultos, que paecía afitada, nunca más se supo. Nun se trabaya la base y tenía qu'haber más relevu, más xente que trabayase cola llingua, normalizala. Hai poca presencia nes empreses y nos medios de comunicación.

'Desencantu' ta siendo'l centru de la polémica por dalgunos de los comentarios que fai usté nos testos y munches crítiques lleguen dende persones próximes a usté o a los sectores asturianistes.
Too esto ye inxustu, porque creo qu'eses persones nun se tomaron la molestia de lleer el llibru, namás pequeñes escoyetes que salieron en dellos sitios. Si lu lleeran daríense cuenta de que ye'l llibru d'un 'altermundista'. Soi fondamente antiglobalización y antineocapitalista. Nel llibru falo de los fanáticos y del fanatismu en xeneral. Creo qu'hai mala intención nes escoyetes que s'espublizaron perehí. Puedo falar de los musulmanes, pero tamién de Cheney o de la España cañí. Lo únicu bonu ye que la polémica ta siendo en llingua asturiana y polo menos tamos dando-y vida. Ye una disputa normalizada.

¿Y les acusaciones de racista?
Nun tien nada que ver. Yo tengo amigos que son de color y de golor. Esti ye'l llibru d'un paisanu que yá ta fartu de too. Yo nun mato nin una mosca. Cuando nel llibru falo d'una «Europa blanca, cuasi tresparente» nun me refiero a un color, si non a una Europa que nacía de la Ilustración y qu'allumó al mundiu; refiérome al racionalismu. Y esta mesma Europa tamién foi castigu del mundiu en dellos casos. Pero prefiero quedame colo positivu.

¿Intenta arremeter contra too?
Sí. La correición política apavórame. Podemos llegar a la parálisis social y mental. Les coses hai que llamales como son y si son doloroses son doloroses. Falemos en cualesquier llingua, pero con claridá. Yo nun diría que mio güelu ye de la tercera edá, yo diría que ye vieyu. A un paisanu que ta llocu, hai que llamalu asina, non buscar otres palabres. Nel llibru tamién hai delles píldores pal neolliberalismu.

Tamién dicen que'l llibru ye misóxinu.
Hai delles vengances, pero pa con dalgunos grupos concretos. Ún de los testos titúlase 'Caga pa elles' y ta dedicáu a aquelles pijes de la mio época, que taben tan buenes y que nos miraben perenriba'l costazu. Agora veoles, yá mayores, y aquella guapura, que yera tolo que teníen, yá nun lo tienen. Pero lo que nun dicen los que m'acusen de misóxinu ye qu'hai otros testos d'agradecimientu dedicaos a otres moces trabayadores a los que los pijos les llamaben marmotes. Y otru a los socialistes, que jodieron la mio vida profesional. Son, eso, pequeñes vengances.

El llibru tamién provocó una tormenta na asociación L'Arribada a la qu'usté pertenez.
Nun entiendo nada. Toi perplexu. El presidente dimitió porque nun-y gustó y dixo que nun lo podía tolerar. El restu entendiéronlo. De toes formes, pa evitar incomodidá yo por voluntá propia pedí la baxa porque creo que la polémica nun ye bona pa ellos. L'Arribada ye un certame cultural mui importante y que va p'arriba, asina que nun quiero que se perxudique pola mio presencia.

¿En qué más trabaya últimamente?
Presenté va poco un DVD sobre bruxes. Ye una forma de facer xusticia audiovisual a unes muyeres que yeren sanadores, xente con poderes y conocimientos, que nun foron bien trataes. Y sigo trabayando y préstame facelo en llingua asturiana, porque ye mui necesario. A poco que nos descuidemos.

(d'El Comercio, 08-07-2008)