XOSÉ LLUÍS CAMPAL FERNÁNDEZ

El vienres 15 de xunu de 1906, al cumplise'l quintu cabudañu del fallecimientu de Leopoldo Alas, 'Clarín', el so collaciu y secretariu de la Universidá uvieína, Pepín Quevedo, dedicó-y, roblándola cenciellamente como P. Q., una riestra de quintilles dende la primer plana del rotativu xixonés 'El Noroeste' embaxo'l rótulu 'Al mió Clarín', una composición que nun se recoyera na edición de la so poesía patrocinada pol Idea, y na que s'afirma que na villa de Xovellanos tenía pensao l'autor de 'La Regenta' dir pasar la so vieyera.

Nunos fachendosos versos fálamos Quevedo, nes ochu estrofes qu'anicien el tributu, de la so vocación lliteraria, cebada dende neñu, y de la dificultá pa cumplir col pruyimientu íntimu delli cuando la fegura escede l'ámbitu familiar. Depués, nes trece restantes, fai l'allabanza de la so capacidá de pensador relixosu, comparándola con un reló suizu; del so tinu como críticu de les novedaes teatrales; del poliglotismu clasicista; de l'agudeza d'abogáu, etc., pero ensin facer mención dala de los sos aportes cuentísticos o novelísticos.

Pal versificador Quevedo, nada fexo Clarín (al que matara'l trabayu intelectual, según esti vate) recriminable na hora d'homenaxalu:

I

Fice coples a la lluna,
a les piedres... qué sé yo.
Poco dimpués de la cuna
tentóme yá la fortuna:
ye'l sinu y san s'acabó.

Que zarró'l güey'un pariente,
y'un suponer, o que a un fío
aporta que i sal un diente;
pos y'arroxa de caliente
aquesti celebru mío;

y paño pluma y papel,
y surten de la mollera
los ringlones a granel,
toos tiraos a cordel,
quier dicise qu'en ringlera.

Vieno el turnu y la ocasión
a Clarín, y un gran respigo
pasóme pel corazón
y pel cránio la visión
d'aquel que foe tan amigo.

Y púnxeme a cavilar
como en d'elles ocasiones,
cuidando qu'en sin tardar
surtiríen a fartar
monterades de ringlones.

Peru anque munchu escurría
pasiando que pasiarás
pa escurrir más entovía
dengún verso me salía
y dábame a Satanás.

En aquella isposición
tuve más d'una quincena;
y direbos la razón
(non me da vergüenza, non):
¿Afogábame la pena!

Al cabu, esburriandu aquí
y zapicandu acullá
estes coples escrebí,
probes porque son de mí,
peru feches con verdá.

II

Ya sabéis quién fo Clarín:
un home qu'entá resplande
de la cencia nel camín;
de cuerpu bien menudín
peru de alma muchu grande.

¿Qué cabeza! Era un relós
que non alteria un segundo,
y non falo a un tres por dos;
¿lo qu'él sabía de Dios
y coses del otro mundo!

Tocante a la obligación
que remanez del derecho,
o qu'el costumbre supón,
naide como él da razón
nin un fallu tan correcho.

El saber si una comedia
ta bien o mal cavilada
dengún como él lu premedia,
y naide, naide remedia
la por él desanunciada.

Si en llatín hay quien lu arguya,
el non ta miga ronceru,
y en llatín mesmu aburuya,
pos fala nel habla suya
a cualisquier forasteru.

Vamos, non calienta el sol
un home más agudín,
y cualisquier español
faría bien tando farol
teniéndolo por vecín.

Utru como él non se vio
pa un contrato cualisquiera,
y xuro y perxuro yo
que la palabra qu'él dio
ye como si el rey la diera.

Morrió el probín fai agora
cinco años, ¿sabéis de qué?,
pos de tar hora tras hora
com'una llocomotora
cavilando y lé que lé.

Si tal pagu da la cencia
al que d'ella ye cautivo,
habéis dicime en concencia:
¿Non ye de más comenencia
ser un gran burru y tar vivo?

Co los amigos, parcial,
gafu co los combayones,
con todo'l mundo carnal,
al gañín quierlu muy mal,
lo mesmu que a los llambiones.

Tantu Xixón i gustaba,
que abondes veces i oí
que allá de vieyu pensaba,
si dos cuartos axuntaba,
marchase a vevir allí.

Entá mozu, con gafura
vieno la muerte a estronzalo:
¿ay!, ye verdá bien segura
que lo güeno poco dura,
y dura muchu lo malo...

Toy p'ascontra mi veyendo
que a pintavos non m'amoldo
lo muchu que toy sintiendo,
y per acabo diciendo:
¿Ay mió Clarín, ay Liopoldo!

(d'El Comercio, 01-04-2008)