VANESSA GUTIÉRREZ

Les instalaciones del Antiguu Institutu Xovellanos de Xixón van acoyer los díes 4 y 5 d'abril les primeres Xornaes de Llingua y Educación organizaes pol sindicatu d'enseñanza SUATEA, y nes que se va tratar dende la relación de la política llingüística cola enseñanza y la formación del propiu profesoráu a la participación de los axentes sociales na defensa de los derechos llingüísticos.
Les I Xornaes de Llingua y Educación van inaugurase'l día 4 d'abril a les 16.30 hores con una mesa redonda que va tratar «Los derechos llingüísticos nel marcu européu y nel Estáu español», y na que van participar los xuristes José Manuel Pérez, Eva Pons y Leopoldo Tolivar, asina como'l maestru d'euskera y conceyal de Nafarroa José Manuel Urroz. Pa con ello, a les 18.30 hores ta previstu un panel d'experiencies que lleva por títulu «Los axentes sociales y la Defensa de los Derechos Llingüísticos» nel que van intervenir Xosé Miguel Suárez, per parte de Xeira; Xuan Xosé Mariño, director de programación de Radiu Sele; Lluismi Orviz, como miembru de la Xunta pola Defensa de la Llingua Asturiana, y Beatriz R. Viado, directora del selmanariu LES NOTICIES.

Formación del profesoráu

La xornada del día 5 va comenzar a les 9.30 hores con una mesa redonda titulada «Política llingüística y Educación». Nella, va participar Urbano Rodríguez, director del C.P. Jacinto Benavente; el xurista José Luis del Río; el profesor de llingua y lliteratura gallega Emilio Imsua, y la responsable de Política Llingüística de Valencia, Julià-Vicent Rey. D'otra manera, «La formación del profesoráu n'Asturies» va ser el tema del coloquiu que va tener llugar a les 10.45 hores, cola participación de Xosé Antón González Riaño, Ana Isabel Álvarez y Carlos Lomas. Pa con ello, a les 12.15 hores, Emilio Imsua, Eva Pons y Juliá-Vicent Rey y José Manuel Urroz van exponer les sos experiencies nos sistemes educativos con llingua vernácula oficial, pa que, a les 16.00 hores, sían Xuan Nel Rodríguez, Ánxel Álvarez, Aitor Etxarte y Angélica Fernández los que centren la temática de la enseñanza llingüística nel campu de la Educación Primaria.

Finalmente, les I Xornaes de Llingua y Educación van tratar a les la situación asturiana, de la que van falar, a partir de les 18.30 hores, la responsable de la Oficina de Política Llingüística de Xixón, María Xosé Rodríguez; los profesores Bertu Cobreros, Lluis Gabriel Antuña y María Rodríguez, y Luis Miguel Álvarez, miembru de la Federación de Xuegos y Deportes Tradicionales.

(de Les Noticies, 27-03-2008)