B. R. V.

Sofía, la capital de Bulgaria, ye la sé del segundu conceyu extraordinariu del Comité Intergubernamental pa la Salvaguardia del Patrimoniu Cultural Inmaterial, que se va celebrar ente'l 18 y el 22 de febreru. Nesta xunta va tar Asturies representada a traviés de l'asociación cultural El Garrapiellu, que va treslladar a esti foru internacional «la situación na que s'alcuentra la llingua asturiana de perda de falantes; la necesidá de midíes de protección efectives y la inseguridá xurídica a la que la condena l'actual Estatutu», explica Sixto Armán, miembru del Garrapiellu que va asistir, xunto col creador Ánxel Nava, a la convención de Sofía.

Amás de dar a conocer nel ámbitu internacional cuál ye l'estáu actual de la llingua asturiana, Armán considera que l'alcuentru ye tamién una bona oportunidá pa <

El Garrapiellu foi ún más de los colectivos asturianos convidaos a esta xunta, y va participar na xunta nel marcu d'actuación que l'asociación desarrolla nel CAO (Conceyu Abiertu pola Oficialidá). La trescendencia d'esti eventu refuérzase cola celebración del Añu Internacional de la UNESCO, remarca Sixto Armán, que lleva por lema «los idiomes sí que cuenten». Nesti sen, Armán destaca que les llingües son «una parte fundamental del patrimoniu inmaterial».

El Comité Intergubernamental qu'organiza esta segundu conceyu tien por oxetivos asesorar sobre práctiques exemplares y formular recomendaciones sobre midíes de salvaguardia del patrimoniu inmaterial a los Estaos. Nel alcuentru de febreru abren la participación gubernamental a diferentes colectivos sociales y culturales que trabayen nel campu del patrimoniu inmaterial.

(de Les Noticies, 15-02-2008)