El miercoles 19 d'avientu, en Conseyu de Gobiernu, aprobóse'l decretu pol que se determinen los topónimos oficiales del conceyu de Llaviana. El decretu respuende a la Llei d'Usu y Promoción del Bable/Asturianu y al Plan de Normalización Sociollingüística aprobáu na lexislatura pasada. A partir de güei los topónimos de Llaviana van tener la denominación oficial na so forma tradicional. Hasta agora aprobáronse los topónimos de 24 conceyos asturianos y 27 expedientes d'otros tantos conceyos tán en fase de tramitación.

De magar entre en vigor la normativa, les Alministraciones Públiques van tener que dir iguando de manera progresiva les rotulaciones en víes públiques y carreteres de Llaviana, amás de mapes y planos oficiales, pa recuperar les formes toponímiques establecíes nel Decretu.

Na web del Serviciu de Política Llingüística puede atopase tola información sobre l'estáu del procesu de recuperación toponímica y el llabor de la Xunta de Toponimia.

(de Les Noticies, 20-12-2007)