Izquierda Xunida-Bloque Por Asturies-Los Verdes comprometióse güei a defender la declaración d'oficialidá de la 'llingua' asturiana na próxima reforma del estatutu d'autonomía d'Asturies. Nesti sen, espresóse'l voceru parlamentariu de la coalición, Jesús Iglesias, tres un conceyu celebráu cola presidenta de l'Academia de la Llingua, Ana Cano.

Pa Iglesias, esta reforma ye "la última oportunidá de garantizar la supervivencia de la llingua", dalgo a lo que, según dixo, "ye favorable la opinión de la mayoría de los asturianos, y que se tien qu'espeyar na opinión política de los partíos representaos na Xunta Xeneral".

"Ensin oficialidá", dixo, "nun hai garantíes reales de supervivencia d'esta llingua pal futuru, anque llueu se diga que se defiende l'asturianu".

"Naguamos", añadió, "por que les próximes selmanes, nes que va empezase a ellaborar el nuevu estauttu, seya la espresión d'esta llucha".

Pela so parte, Ana Cano, afirmó que "nun s'entiende la reforma del estatutu ensin la inclusión de la declaración d'oficialidá". Al so xuiciu, "nun se pue dicir que se ta a favor del asturianu y de la protección de la llingua, y llueu nun tar d'alcuerdu cola oficialidá".

La reconocencia de la 'llingua' como oficial "nun ye nenguna imposición d'obligatoriedá pa la xente que quiera falalu", sinón, "la garantía de que la xente que lo quiera pueda utilizalu". "Los argumentos de que tal midida pueda conllevar el surdimientu d'un nacionalismu escluyente son disculpes absurdes", concluyó.

El conceyu ente dambos ta dientro de la serie d'alcuentros que Cano caltién periódicamente con representantes de partíos políticos con representación parlamentaria, ensin representación y organizaciones sociales y sindicales.

(d'Europa Press, 26-11-2007)