HÉCTOR XIL

Va yá unes selmanes prendía una pequeña polémica, qu'amortigañó lluego, a partir d'una noticia sobre la nuesa llingua en territoriu llionés. D'esta manera, la posibilidá cierta del enseñu extraescolar del llionés, xunto con aspectos de la cultura tradicional llionesa nes escueles del municipiu capitalín, valió a la so manera pa prender esa polémica y mostrar a les clares les propuestes y actitúes pa cola llingua d'un sector del llionesismu. Un sector al que s'ascriben asociaciones como El Fueyu o l'Asociación de Profesores de Llïonés (sic) vinculaes claramente a les directrices, y que nos lleven a ver cómo igüen l'entornu o «frente cultural», de l'asociación política de mocedá: Conceyu Xoven.
Dende los postulaos d'estos grupos plantéase anguaño -frente a lo qu'afirmaben años atrás- una realidá llingüística llionesa conformada por una llingua llionesa, diferente de l'asturiana, anque inclusiva pa col mirandés, sobre la base de la reinvención y manipulación de dellos datos, pero que dicen bien pa cola so propuesta de construcción del discursu identitariu llionés que vienen faciendo. Un discursu identitariu sobre'l que refacer el vieyu país acordies colos mapes que tracen y que tienen que facer coincidir igualmente col mapa d'esa llingua.
Énte esto la primer reacción, tamién del qu'escribe, foi la de falar d'isolacionismu, d'una nueva Valencia y la de ruptura de la unidá del dominiu, pero que pasao yá un pocoñín de tiempu llévame a reflexonar sobre esos aspectos y especialmente l'oxetivu y finalidá d'esa estratexa.

[...]

(de Les Noticies, edición dixital, 09-11-2007)