Pablo Rodríguez Medina, seique l'autor más premiáu de la lliteratura asturiana de tolos tiempos, ta acabante facese con un nuevu galardón, el preciáu Garrapiellu que concede la tertulia xixonesa del mesmu nome dotáu con 900 euros, cola narración breve "Graziela con zeda"; nel cuentu, con un llinguaxe equilibráu y dominiu de la técnica cuentística, l'autor afonda nel so particular universu de ficción. Otramiente, Sidoro Villa Costales mereció una mención especial del xuráu pola so narración "Anunciu", acutando asina l'accésit del premiu de 300 euros.

La Tertulia El Garrapiellu vien desenvolviendo, dende hai venti años, un llabor incansable en favor de les distintes facetes de la cultura asturiana, con especial atención hacia la lliteratura. Formada nos años 80 al amparu del movimientu vecinal del Polígonu de Pumarín (Xixón), mui bien llueu destacó poles sos iniciatives culturales.

(d'Asturnews, 6-11-2007)