El sábadu 27 d’ochobre la Caravana pola Oficialidá del CAO recorrío los conceyos del suroccidente. La filera de coches salió a les diez y media de la mañana de la plaza Las Campas en Tinéu pa dir hasta Navelgas, Xera, La Puela y acabar en Cangas; en total más de cien quilómetros de fiesta y reivindicación llingüística.

Yá pela tarde el Teatru Toreno de Cangas llenóse dafechu pa acompañar les actuaciones de Rafa Lorenzo, Pedru Pereira, Ambás, Dolfu Fernández y Alberto Ablanedo, que tocar de manera solidaria pa esti actu; y escuchar la intervención del portavoz del CAO na que se pidía otra vez más “la oficialidá de la llingua asturiana pa que se respeten d’una vez por toes los derechos de los falantes y pa que l’idioma tenga dalguna posibilidá real de sobrevivir nel futuru”. Depués féxose la rifa de dos cestes con productos donaos polos comercios de Cangas, momentu que s’aprovechó p’anunciar les marches y la manifestación del 24 payares.

Pa rematar la xornada fíxose un filandón bien prestosu nel que volvió dexase bien claro que la reivindicación de la oficialidá nunca va dar pasos atrás nestos conceyos del suroccidente.

(de la Xunta pola Defensa de la Llingua, 31-10-2007)