MIGUEL BARRERO

Antón García pon nes llibreríes el primer tomu de «Xeneraciones y dexeneraciones» (Trabe), una obra cola que l'escritor de Tinéu quier plantear una visión crítica de la lliteratura asturiana que nesta primer entrega abarca dende Antón de Marirreguera hasta Fernán Coronas. García, que yá trabaya na segunda entrega, cree que «non tolo que se publicó y se publica n'asturianu merez la mesma atención».

-La carencia d'una crítica rigurosa, ¿nun ye tamién ún de los problemes de güei?
-Bono... Efectivamente, falta crítica, pero creo qu'hai coses que se tán faciendo que son mui interesantes. Toi pensando, por exemplu, nel trabayu críticu de José Luis Piquero o de José Ángel Gayol. Creo qu'esa xera de lleer un llibru y dicir lo que ta bien y lo que ta mal ye dalgo a lo que tamos tan poco avezaos que cuando nos toca que nos digan que lo que facemos nun ta bien pareznos mui mal, pero creo que ye l'únicu camín: dar pistes a los posibles llectores de per ónde tienen que dir y qué paga la pena lleer. Sinceramente, creo que tolo que s'escribe n'asturianu merez atención crítica, pero ye evidente que non too ye bono, y el que dalguién se dedique a lleer y señalar los errores pienso que ye'l trabayu fundamental que la mayor parte de los que nos movemos dientro de la lliteratura n'asturianu nun sabemos apreciar no que val. Parezme un trabayu mui valiente.

-Hai tamién una carencia importante d'obres que tengan la motivación d'éstes «Xeneraciones y dexeneraciones», la d'establecer una visión crítica y amplia de la lliteratura asturiana.
-En realidá hubo una oportunidá perdida mui guapa, que foi la «Historia de la Lliteratura Asturiana» que sacó l'Academia de la Llingua. Esi trabayu dedicóse más a inventariar qu'a facer crítica, y yo diba agradecer un llabor más críticu. Vuelvo a lo mesmo: tola xente qu'escribe n'asturianu tien munchu méritu, pero non toos tienen el mesmu aciertu. Topar una publicación qu'oriente, que se mueye, diba ser fundamental. L'Academia, nesi trabayu, nun lleó tolo que se fixo sobre lliteratura asturiana hasta l'añu nel que sacaron l'estudiu, lo que me parez un error mui grande. En segundu llugar, parez que se dedicaron a midir l'espaciu que-y dedicaben a cada autor pa que toos ocuparan lo mesmo, cuando non tolos qu'escriben n'asturianu requieren el mesmu espaciu. Hai xente con una obra interesantísima sobre la qu'hai muncho que dicir y xente con una obra menor que puede pasar con una o dos llinies. La Universidá, per otru llau, tampoco xenera nengún tipu de debate críticu sobre la lliteratura asturiana, y yá nun voi falar del RIDEA o de determinaos sitios, porque cada vez me da más vergüenza lo que tán faciendo. O, meyor dicho, lo que nun tán faciendo.

-Nesi sen, tamién nel llibru critica otros «inventarios», como'l de Carmen Díaz Castañón, que foi una de les primeres n'ocupase de la lliteratura asturiana.
-Carmen Díaz Castañón foi una muyer cola que traté abondo unos años enantes de que morriera, y la verdá ye que tuvi mui bon tratu con ella. El problema foi que la punxeron a ella a facer la Historia de la Lliteratura Asturiana cuando ella nun creía nin que l'asturiana fora una lliteratura nin que l'asturianu sía una llingua. Alcuérdome de la emoción cola que nel añu 1977 accedí al llibrín aquél que sacó Ayalga, y un poco de la llectura d'esi llibru vienen les mios ganes de profundizar nel conocimientu de la lliteratura asturiana. Nun tengo vocación d'historiador de la lliteratura, pero realmente aquel trabayu dexóme profundamente insatisfechu porque nun taba d'alcuerdu nin colo que dicía nin col métodu qu'utilizaba nin coles valoraciones que facía nin colos autores qu'escoyía nin nada de nada. Pero bono... Seguramente entós ella yera una de les que meyor podía estudiar la lliteratura asturiana, en bona parte porque les tenía en casa, na so biblioteca, y eso nótase, porque los llibros de los que fala son los qu'ella tenía na biblioteca. Munches veces malapenes falaba de lo que nun tenía en casa.

-Precisamente nel llibru destaca de forma indirecta la importancia de la prensa na difusión de la primera lliteratura asturiana pola escasez bibliográfica.
-Sí. Nel sieglu XVIII la lliteratura asturiana difundíase al traviés de los manuscritos, y ye nel sieglu XIX cuando entama a imprimise pa rellenar espacios nos periódicos, que necesitaben materiales nuevos qu'ofrecer a los llectores.

(de Les Noticies, edición dixital, 1-11-2007)