Llevar la reivindicación de la oficialidá a tolos sitios d'Asturies ye l'oxetivu del Conceyu Abiertu pola Oficialidá (CAO) y asina lo vien faciendo dende la so formación a traviés de les distintes Caravanes pola Oficialidá que yá pasaron pela cuenca'l Nalón, el Caudal, Siero y Avilés. El suroccidente del país ye'l siguiente destín, cola marcha convocada pal sábadu 27 d'ochobre con salida a les 10.30 hores de la Plaza de Las Campas de Tinéu. Navelgas, Xera, La Puela y Cangas, onde termina l'itinerariu, son los puntos pelos que va pasar la caravana. Esta marcha encuádrase nes actividaes de la seronda coles que se quier «calentar motores» de cara a la manifestación convocada pal 24 de payares n'Uviéu pa reclamar la oficialidá del asturianu.

Con esta iniciativa quier «espardese la reivindicación de la oficialidá per tolos sitios d'Asturies, pasar pelos pueblos, informar y falar colos vecinos sobre esti tema, da-yos el decálogu de la oficialidá, nel que s'explica en qué consiste y porqué se fai esta reivindicación», comenta Fernando Ornosa, portavoz del CAO. Asina se va facer nel trayectu previstu pelos conceyos de Tinéu, Ayande y Cangas del Narcea, nuna xornada divulgativa que se va allargar hasta pela nueche. De tarde, ta previstu un actu «informativu-festivu» nel Teatru Toreno de Cangas a les 19.00 hores, onde se va explicar qué ye la oficialidá y qué ye lo que pide'l CAO.

Na parte lúdica va contase coles actuaciones de destacaos músicos de la zona, como Pedru Pereira, Rafa Lorenzo, Ambás, Diego Pangua, Dolfu R. Fernández y Roberto Ablanedo. El que los artistes participantes nel eventu sían orixinarios de los conceyos nos que se celebra la caravana respuende a la intención del CAO de que sían los propios creadores y activistes de la zona los que s'impliquen y impliquen a la población d'estos conceyos: «Siguiendo la filosofía qu'acompaña a les caravanes feches hasta agora, la movilización y les actividaes que la acompañen van tar entamaes poles organizaciones y colectivos de los propios conceyos; igualmente, les actuaciones musicales van correr a cargu d'artistes locales», expón el CAO na presentación de la iniciativa. La xornada termina nel Bar Caniecho con un Filandón que principia a les 21.30 hores. La participación en tolos actos ye de baldre.

L.lena y Ayer

La Caravana pola Oficialidá treslládase'l 3 de payares a los conceyos de L.lena y Ayer, onde se ta organizando una xornada de característiques asemeyaes y col mesmu oxetivu que la convocada'l sábadu 27 nel suroccidente: esparder la reivindicación de la oficialidá. A estes actividaes que'l CAO programa pa payares axúntense, ente otres, la celebración d'amagüestos en Siero, el Caudal y el Nalón, nel mes de payares. Toles actividaes de la seronda entren dientro de la campaña de preparación de la manifestación del 24 de payares pola oficialidá del asturianu, convocada énte la inminente apertura d'un procesu de reforma estatutaria.

El CAO creóse en xineru de 2005 cola intención d'axuntar el másimu númberu d'esfuerzos na reivindicación de la oficialidá. Más d'un centenar d'organizaciones sociales, polítiques, sindicales y culturales alcuéntrense nesta plataforma dende la que se quier dar la vuelta a una «situación inxusta» que requier d'una solución xurídica «que garantice la igualdá de derechos civiles a tolos asturianos».

(de Les Noticies, edición dixital, 26-10-2007)