La escritora Consuelo Vega ponse al frente de la Dirección Xeneral de Promoción Cultural y Política Llingüística cola voluntá de «sumar a lo que ta fecho», calteniendo una llinia continuista cola lexislatura anterior y dando al empar pasos alantre. Ún de los apuestes más fuertes ye la promoción cultural, a lo que s'amiesta l'oxetivu de Vega de «completar» lo que se fixo en política llingüística «nel marcu que tenemos».

Beatriz R. Viado

-Desque principió la lexislatura vien destacándose'l llabor que se va facer en promoción cultural. ¿Qué mecanismos se van poner en marcha nesti ámbitu?
-De mano yá hai unes bases bones sobre les que trabayar: tenemos mui bonos equipamientos culturales en prácticamente tolos conceyos y agora tamos desarrollando un segundu nivel, los auditorios, con vocación supramunicipal. L'oxetivu nestos cuatro años ye tener, d'ueste a este, una serie d'auditorios estratéxicamente allugaos p'acoyer producciones que requieren más escenariu, más públicu y más infraestructura. Asina qu'habría una rede primaria (biblioteques, Cases de Cultura, sales d'exposiciones) y los auditorios previstos en Navia, Valdés, Siero y Llanes, lo que sumao a Avilés, Xixón y Uviéu fai que tol mapa d'Asturies quede baxo l'aria d'influencia d'ún d'estos auditorios que permita un tipu d'actividá cultural que nos otros espacios nun hai.
Pasando a lo inmaterial, pretendo organizar una política cultural qu'atienda a tolos sectores de creación: artes plástiques, teatru, música, lliteratura..., poniendo les condiciones pa que se pueda desarrollar el trabayu creativu: nunos casos, como diría Virginia Wolf, lo que se necesita ye un cuartu pa escribir, mentes qu'un grupu de rock puede necesitar unos locales d'ensayu. La segunda fase ye qu'en tolos conceyos haya actividaes culturales nes que los creadores puedan amosar lo que fain, y la tercera abrir calces pa dalos a conocer fuera.

-Na inauguración del teatru Llaboral, l'apueste «estrella» de la política cultural, llamó l'atención l'ausencia d'artistes asturianos na so programación.
-Ye un apueste «estrella» porque ye un gran teatru asturianu y ún de los mayores del Estáu, pero la so existencia nun implica qu'haya que repetir lo que se ta faciendo n'otros teatros, nin que vaya a sustituyir l'actividá teatral qu'hai nel restu d'Asturies. Llaboral ye un espaciu nel que van tener presencia les compañíes y los artistes asturianos y toles tendencies nueves, dalgo que tamién ye necesario. N'Asturies tenemos compañíes de teatru profesional mui bones, y hemos siguir moviéndoles per tolos conceyos, apoyando la producción teatral n'asturianu y en castellanu, y tirar pola so proyección exterior, pero eso nun ye incompatible con que Llaboral pueda traer a Asturies coses interesantes de fuera. Nenguna comunidá ye quien a autoabastecese culturalmente -lo qu'amás diba amiserianos-, y ha buscase un equilibriu ente la producción propia y el que lleguen equí corrientes que nos arriquezan.

-¿Qué midíes se van a echar a andar pa la proyección exterior de los creadores asturianos?
-En cada campu cultural habrá una manera. Por exemplu nes artes plástiques yá hai dos pasos importantes daos al contar cola sé d'Asturies en Madrid y Bruseles, coles que tamos falando p'articular una política continuada pa enseñar nel exterior lo que se fai equí. Amás, tenemos un conveniu de collaboración pa exposiciones col Bancu Herrero que se va renovar pa otros cinco años con un añedíu: mirar la forma de dar una salida exterior a exposiciones d'artistes asturianos. Otra cuestión importante ye abrir camín a les feries d'arte pa que los artistes asturianos puedan entrar en contactu con esti mercáu y vayan contra un desarrollu autónomu. Cada campu va tener unos mecanismos específicos: por exemplu en creación lliteraria yá trabayamos col Gremiu d'Editores y falamos cola Asociación d'Escritores pa la participación exterior de la lliteratura que se fai n'Asturies, tanto en castellanu como n'asturianu -teniendo claro que la lliteratura d'Asturies nun s'entiende sin la lliteratura n'asturianu, polo que nun se va facer una política de promoción de la lliteratura separada, va contase tanto colos autores en castellanu como n'asturianu-: vamos mantener la feria del Llibru de Madrid y Liber de Barcelona, y pal 2008 vamos participar na Feria de Guadalajara (México), la mayor feria mundial del mundu hispanu, mentes que pal 2009 queremos tar tamién na Feria de Frankfurt.

(de Les Noticies, edición dixital, 25-10-2007)