Dende'l llunes 5 hasta'l 8 de payares l'Academia de la Llingua Asturiana organizá'l Congresu Internacional de Lliteratura Asturiana nel salón d'actos del la Facultá de Filoloxía de la Universidá d'Uviéu. La inauguración va tener llugar el llunes 5 nel salón d'actos del campus del Milán d'Uviéu pa siguir darréu con una conferencia titulada "De llingua y Llliteratura"a cargu de Xosé Lluis García Arias. El programa del llunes complétase a les 18:30 hores cola actuación de la banda ribeseyana Corquieu.

El director d'Asturnews, Próspero Morán va pronunciar, durante la xornada del martes 6, una conferencia sobre comunicación embaxo'l nome "Periodismu cultural y lliteratura asturiana" a les 17:15 hores. Les xeres pa esi mesmu día 6 entamen dende bien tenpranu, a les 09:30 hores cola participación de Marcela Romano de la Universidá de Mar del Plata d'Arxentina que va falar sobre "L'orbayu nos llabios. notas sobre la canción de autor asturiana". Otros participantes n'esta primer sesión van ser Xandru Martino, Xosé Antón Fernández o José Enrique Gargallo. El día va finar con una mesa redonda na que van participar Ana Vanessa Gutierrrez, Pablo Texón y Berto García alrodiu del panorama poéticu asturianu.

El miércoles pela mañana va escomenzar la xornada Jorge Domingo Cuadriello del Institutu de Lliteratura Y Llingüística de Cuba que va falar sobre la lliteratura asturiana en cuba pa continuar cola conferencia d'Andrés Villagrá de la Universidá de Nueva York alrodiu del papel de la lliteratura de la nuesa rexón na emigración. L'escritor Xuan Santori tamién tien el so espaciu reserváu nel Congresu cola conferencia "L'ambición lliteraria", a les 16:00 hores. Pela tarde, ente otres ponencies, Pablo Rodríguez Medina falará sobre'l tratamientu que se fai de la homosexualidá na narrativa asturiana y Próspero García y Chechu García van averar a los asistentes al mundiu del comic n'asturianu. El congresu cerrará les puertes esti día con una mesa redonda sobre narrativa.

Durente el xueves 8, dia del pieslle del Congresu va inaugurase nel Café Español d'Uviéu (Cimavilla s/n), la esposición "La lliteratura n'asturianu" que va permanecer abierta al públicu hasta´l 30 de payares. Nel apartáu de conferencies van intervenir Xose Lluis Campal, Berta Piñan, Marta Mori, Laura Marcos, o Ramiro González ente otros. Esti últimio día va echar el pieslle con l'habitual mesa redonda, nesta oacosión sobre la escena teatral n'asturianu d'anguaño.

(d'Asturnews, 22-10-2007)