La Xunta Moza, mocedá de la Xunta pola Defensa de la Llingua Asturiana, convocó ayeri pela mañana una rueda de prensa pa denunciar “la situación marxinal de la llingua asturiana nel sistema educativu y l’asaltu sistemáticu a los drechos llingüísticos más básicos de tola población estudiante”.

Nesta rueda presentóse un informe sobre la situación de la llingua asturiana na enseñanza nel que se destaca “qu’a la falta d’un marcu llegal dignu que garantice los drechos llingüísticos y educativos de los estudiantes, súmase’l fechu de que la Conseyería d’Educación incumple la curtia llegalidá vixente de manera sistemática”. Asturnews.com ufre l’Informe completu.

Na rueda, espunxéronse “casos sangrantes” como los asocedíos esti cursu nos institutos de Pando n’Uviéu, La Llaboral en Xixón o el de Llanes ente otros, que nieguen a los sos alunmos el derechu a estudiar l’asturianu incluso pa grupos de matriculaos mui superiores al ratio mínimu d’ocho impuestu illegalmente pola Conseyería. Na rueda de prensa, na que tamién participaron representantes del Conceyu Universitariu pol Asturianu (CUPA), Mocedá d’Andecha-EMIR y de los Coleutivos de Mocedaes Comunistes (CMC), denucióse tamién la represión que carecen los militantes implicaos na defensa de la llingua asturiana. Púnxose l’exemplu d’un rapaz que ta acabante facer frente a una multa de más de 350 euros por pegar carteles pa la última fuelga d’estudiantes pol derechu a estudiar asturianu.

Amás anuncióse que “pa recaudar fondos y facer visible esta agresión va facese una fiesta solidaria’l prósimu vienres 26 d’ochobre nel chigre de la Xunta, La Casa Posafuelles.

(d'Asturnews, 17-10-2007)