El Gobiernu asturianu retira la señalización n’asturiano de los edificios oficiales
La Xunta pola Defensa de la Llingua Asturiana emitió un comunicáu nel que denuncia que’l nuevu Gobiernu asturianu «estrénase faciendo desapaecer la llingua asturiana de los pocos rétulos oficiales de les conseyeríes onde taba presente». La XDLA valora esta cuestión como «una declaración d’intenciones contundente que demuestra que la eliminación de la llingua asturiana ye una prioridá inaplazable pal nuevu gobiernu d’Álvarez Areces». La organización denuncia tamién «l’actitú fuina de los representantes políticos d’esti gobiernu, qu’en declaraciones a los medios dicen que tán a favor de la protección del asturiano, al empar que na so acción de gobiernu amuesen síntomes d’alerxa patolóxica ente la presencia de la llingua asturiana». La XDLA asegura qu’a esti gobiernu «da-yos perceguera l’asturiano y nun son a disimulalo» y que «con estes actuaciones queda más claro entá que’l discursu anti-oficialidá d’esti executivu nun ye otro que la materialización política de los sos prexuicios y el so apueste por mantener la marxinación del asturiano y la falta de derechos llingüísticos pa les persones que lo falen».

El CAO presentó una gran manifestación pal día 24 de payares
El día 6 de setiembre celebróse una asamblea xeneral del Conceyu Abiertu pola Oficialidá (CAO) na que se fixo la presentación oficial de la manifestación que va tener llugar el próximu día 24 de payares peles casi d’Uvieo. Esta mobilización quier dar un saltu cuantitativu y cualitativu a favor del asturiano, faciendo medrar la presión na cai conforma se vaya acercando la reforma d’Estatutu asturianu.
Na asamblea tuvienon presentes representantes de les organizaciones polítiques, sindicales y sociales qu’igüen el conxuntu de les más de 100 entidaes componentes del CAO, amás de xente independiente que quier apoyar la causa col so trabayu personal. El portavoz del CAO, Fernando Ornosa, presentó a los asistentes el calendariu de mobilizaciones pa esta seronda, qu’incluye dos caravanes pola oficialidá y una gran manifestación pal 24 de payares. Pa finales de setiembre ta prevista una caravana pelos conceyos d’Ayer y L.lena, mentres que’l sábadu postreru d’ochobre la caravana va circular pelos conceyos occidentales de Cangas, Tinéu y Ayande.
Tocante a la manifestación del 24 de payares, la organización busca dar un reblagu organizativu iguando la mobilización a favor del asturiano más ambiciosa de toles feches hastasagora. La manifestación –que va salir a les 18:00 hores de la Estación del Norte d’Uvieo– va recibir delles marches que van llegar a la capital asturiana pa participar na mobilización. De mano tán previstes marches dende’l valle del Nalón, el valle del Caudal, Trubia, Siero, Xixón y Avilés, que van salir a distintes hores pa dir a pie hasta la capital y coincidir nel entamu de la manifestación.

Denuncien la hipocresía del conseyeru d’Educación
L’Asociación de Trabayadores de la Normalización Llingüística emitió un comunicáu nel que criticó les últimes declaraciones del conseyeru d’Educación, José Luis Iglesias Riopedre, sobre la escolarización billingüe, que calificanon d'«insultu». Riopedre, cuestionáu polos colectivos de defensa del asturiano, prometiera triplicar les aules billingües castellano-inglés.
L’asociación que formen los trabayadores y responsables de les oficines y organismos de normalización del asturiano d’Asturies, recuérda-y a Riopedre que’l que l’alumnao matriculao en clases billingües saque meyores notes, «ye cosa que yá se sabía de va tiempu», y asegura que «lo hipócrita ye que s’atreva a dicir eso un conseyeru que nun acaba de solucionar los problemas de la escolarización n’asturiano, que nun garantiza’l derechu individual de los escolinos y escolines a estudiar asturiano –siempre dependiendo de ratios y de la voluntá de dalgunos profesores–, que tien la llingua asturiana como asignatura optativa en secundaria –vulnerando asina la voluntariedá de la que fala l’Estatutu d’Autonomía–, y que tolera que la mayoría de les escueles concertaes nun cumplan la llei –como nel casu del Loyola n’Uvieo–». Pal colectivu resulten «insultantes» les últimes declaraciones del conseyeru, «a nun ser que nun considere l’asturiano como una llingua, que tal paez, viendo como actúa». L’asociación píde-y a Riopedre que la so conseyería «cumpla cola llei, y que cumpla la promesa que fixera hai años públicamente de que l’asturiano diba empicipiar a ser llingua vehicular na enseñanza, p’acabar de verdá cola discriminación llingüística y pa que los escolinos y escolines que voluntariamente quieran, puedan tener una educación de calidá y n’asturiano».

Pallabres
L'automobilismu
Gran premiu
Carrera
Clasificación
Posición preferente
Armadera de salida
Coche de seguranza
Neumáticu
Pilotu
Mecánicu, -a
Revuelta
Recta
Gasolina
Cascu
Funda
Rastru
Adelantamientu

En ca'l ferreru,
cuchiellu de madera

(de Llengües Vives, Setiembre 2007)