La directora xeneral de Promoción Cultural y Política Llingüística, Consuelo Vega, declaró que "la oficialidaá de la llingua asturiana va llegar cuando haya un mayor alcuerdu políticu" qu'espeye "el sentir mayoritariu de la sociedá". Consuelo Vega esplicó nuna entrevista concedida n'esclusiva a l'axencia Europa Press que, siendo namás IX/BA/LV la única fuerza política partidaria de la oficialidá énte l'entamu del procesu de reforma del estatutu, ello significa que "hai mui pocu pesu pa facer un cambiu d'esti tipu".

Sicasí, la socesora de Ramón d'Andrés al frente de la oficinaque "hai un campu mui grande pa trabayar col marcu llegal qu'existe agora", refiriéndose al actual Estatutu d'Autonomía, y a la Llei de Promoción y Usu del Asturianu. Pa Consuelo Vega, anque "la oficialidá lleva arreyaes ya otru tipu d'actuaciones y de compromisos por parte de toles instituciones públiques y de la ciudadanía" entovía ye posible "desarrollar un llabor importante en política llingüística" en cuantes que "nun se pue dicir que tocáremos techu, nin que desarrolláremos toles posibilidaes d'esti marcu completamente, porque queda muncho por facer".

Tocante a la poémica sobre la validez llegal de la Lley d'Usu y Promoción del Asturianu abierta al rau del casu del lletráu Xurde Blanco, al que l'alministración nun reconoció'l derechu a espresase con ella n'asturianu , Vega adelantó la intención del Gobiernu asturianu de revisar y modificar la norma en casu de que'l Tribunal Constitucional decida finalmente que l'artículu 4.2 de la mesma sía inconstitucional como pide un xuez uvieín. Sicasí, casu de que'l TC decida que l'artículu ye constitucional, y que como pide Xurde Blanco, haya qu'atender non sólo a los ciudadanos sinon tamién a los funcionarios, ello aplicarase dende l'alministración.

En cualquier casu, y anque'l Principáu vaya echase al pie de lo que diga'l TC, Vega adelantó que, al so paecer "la llei nun ye inconstitucional" anque entiende que la llei, con reconocer el derechu de los ciudadanos a rellacionase n'asturianu cola alministración, nun se refier al funcionamientu ente los propios funcionarios porque "na práctic diba ser mui difícil consiguir que tolos empleaos públicos se formaren en conocimientos d'asturianu".

Vega, dexando aparte'l casu de Xurde Blanco, aclarió que "sacantes anécdotes puntuales, nunca hebo problemes nes comunicaciones n'asturianu de los ciudadanos cola alministración" asegurando que "desque s'aprobó la Llei, cuando se presenta un escritu n'asturianu, esti tramítase ensin más unviándose a la Conseyería de Cultura pa que faiga una traducción oficial y actuándose sobre la versión castellana".

(de Asturies.com, 15-10-2007)