Redacción.
Una nueva edición de la Selmana de les Lletres Asturianes, y van ventinueve, va entamar esti llunes en Xixón dedicada a la figura de la escritora María Teresa González, que morrió prematuramente va trece años dexando una importante obra poética y narrativa, con llibros como “Collaciu de la nueche” o “La casa y otros cuentos”, el primer volume de narrativa non infantil o xuvenil espublizáu por una autora del Surdimientu. Los actos d’esta fiesta añal de les lletres van celebrase na so mayor parte en Xixón, anque tamién Uviéu y L’Entregu van acoyer delles actividaes.
L’actu inaugural de la Selmana de les Lletres Asturianes va celebrase esti llunes a les 12.00 hores nel Centru Municipal Integráu d’El Coto, en Xixón y va consistir na presentación de la 29 Selmana de les Lletres Asturianes, les ediciones conmemoratives: “Por si dixerais el mio nome…”, compuesta por artículos sobre l’autora, l’Antoloxía lliteraria, que recueye la obra de l’autora xixonesa homenaxeada.
Amás, nesi mesmu actu va inaugurase la esposición “La mar. Un viaxe per Tere González”, que va tar abierta al públicu hasta’l vienres 16 de mayu n’horariu de 10.00 a 13.30 y de 17.00 a 21.00 hores con entrada llibre. La esposición va pasar darréu a circular peles Cases de Cultura d’Asturies.
Les actividaes d’esti primer día de la Selmana les Lletres van completase, a les cuatro y media la tarde, cola emisión pela Radio del Principáu d’Asturies (RPA), del programa especial “M.ª Teresa González: una muyer del Surdimientu”, dientro del programa “Nomes d’Asturies”, dirixíu por Chechu García y con formatu de radionovela.
El miércoles los actos van tener un calter institucional, y ye que va celebrase, per cuarta vegada, y a la una la tarde, la yá tradicional llectura pública institucional de testos n’asturianu nel Salón Europa de Xeneral del Principáu d’Asturies, n’Uviéu. El parllamentu asturianu va volver a acoyer asina, una llectura que-y dea visibilidá pública a la lliteratura asturiana.
El xueves, a les ocho la tarde, los actos treslládense a la Biblioteca d’Asturies “Ramón Pérez d’Ayala” d’Uviéu, onde va celebrase l’espectáculu “Ñacerán otres nueches como esta”. Nel actu van intervenir los músicos Xuan Nel Expósito, Rubén Bada, Andrea Joglar y Toli Morilla., les actrices: Isabel Friera, Carmen Gloria García, Marisa Vallejo y Luz María del Sol y los escritores: Sergio Gutiérrez Camblor, Alejandra Sirvent, Elisabeth Felgueroso y Pablo Rodríguez Alonso.
Yá l’últimu día de la Selmana, va dedicase un actu a los más mozos, col actu escolar institucional de celebración de la Selmana de les Lletres Asturianes nel Colexu Públicu de L’Infiestu, a les doce la mañana. Nel actu van intervenir les autoridaes responsables de la Selmana, va celebrase la entrega de los premios del “XII Concursu de Poesía y Dibuxu” y del “V Concursu de Cartelismu”, amás de cuntar con delles actuaciones.
Al mesmu tiempu, nel Parque “María Teresa González”, nel barriu de Tremañes, en Xixón, va facese una ofrenda floral en memoria de l’autora y a la una, yá nel Centru de Cultura Antiguu Institutu, va presentase la Obra completa de María Teresa González, editiada por Trabe.
Esi mesmu día, el vienres 9 de mayu, va celebrase como cada añu’l Día del Llibru n’asturianu, nel que nes llibreríes d’Asturies, y pola compra de llibros n’asturianu, van entregase un llibru y una flor a cada veceru.
A toes estes actividaes va sumase una esposición “M.ª Teresa González: una collacia ente nós”, una amuesa de testos y dibuxos sobre la vida y obra de la escritora fechos polos neños y neñes d’Educación Primaria de les escueles de Xixón. La esposición va poder vese de 10 a 13.30 y 17.00 a 20.00 hores nel Centru Municipal d’El Natahoyo (Xixón), ente’l 30 d’abril y el 9 de mayu. La esposición va poder visitase tamién más tarde nel Centru de Cultura Antiguu Institutu de Xixón, ente’l 9 y el 21 de xunu.
[ANEXU: Programa completu de la XXIX Selmana de les Lletres Asturianes]
(d'Asturnews, 01-05-2008)
Esbilla
del.icio.us