Aconceyáu’l xuráu del premiu “Asturies” d’ensayu, conocáu pola Editorial Espublizastur, presidíu por David Rivas Infante y compuestu por Xose A. Armayor, Fonsu Fernández Álvares y Mª Carme Marqués, alcordó otorga-y el primer premiu a la obra “Turismu ya identidá Nacional”, qu’una vuelta abiertes les pliques resultó ser obra de Bruno Gómez Jiménez.
L’asociación Xareos! Xestión Cultural y la revista Formientu, en collaboración cola editorial La Cruz de Grau, convoquen la segunda edición del Certame de Microrrellatos Mozos “Formientu”, que nesta ocasión ha escribise con llingüaxe SMS embaxo’l títulu “¡Si nun llego a recibir aquel SMS…!”. Nel Certame ha escribise colos 160 caracteres que formen un mensaxe unviáu con un teléfonu móvil. Dende Formientu, camienten que “pue que seya hasta l’únicu tipu de testu que les xeneraciones más moces redacten y remanen con más remangu que les más madures”.
PABLO R. ALONSO
La Conseyería de Cultura, en collaboración cola Facultá de Bioloxía de la Universidá d'Uviéu, va entamar esti martes 10 de payares el "II Día de les Ciencies Asturianes". Dos van ser les actividaes programaes pa esti día. Darréu de la inauguración a les 12:00, va presentase'l llibru "Homo Sapiens: la epopeya d'un llinaxe", obra de Xosé María Fernández que resultó ganadora en 2008 del premiu d'ensayu Fuertes Acevedo. Nesti actu, xunto al autor, que ye miembru del Institutu Européu de Bioinformática, va tar Xosé Ánxelu Gutiérrez Morán, del Institutu Español d'Oceanografía.
XOSÉ LLUÍS CAMPAL
Una preba de que nun había motivu que chare p’atrás a los versificadores bables ye esti chanciosu responsu funerariu pola desapaición d’una publicación que mos ufre Menda en ‘R. I. P. La Batalera’ (La Voz de Avilés, 6-IX-1912). En 98 octosílabos pasa revista a los más significaos collaboradores d’ella con melodramática sorna.
L'escritor Ismael González Arias resultó ganador de la segunda edición del Premiu Infantil y Xuvenil en llingua asturiana 'María Josefa Canellada', que concede la Conseyería de Cultura y Turismu del Principáu, según informó'l Gobiernu rexonal nuna nota prensa.
El vienres 6 de payares a les 13.00 hores va fallase'l Premiu "María Josefa Canellada" de lliteratura infantil y xuvenil n'asturianu, que concede la Conseyería de Cultura y Turismu, na Casa Cultura "María Josefa Canellada" de Santolaya (Cabranes).
Miguel Ramos Corrada abrió’l campu de la lliteratura nes Xornaes Internacionales d’Estudiu con un repás a la visión sobre la lliteratura asturiana del padre del modernismu hispanu, Rubén Darío, al que recordó “criticó Clarín”. Esti espublizó a principios del XX y dempués de numeroses visites d’ociu a Asturies, la esbilla d’artículos sobre’l país “En Asturias”, dientro del llibru “Todo al vuelo”. Destaca ente estos artículo “O(sic) poesía asturiana”, nel que, según comentó Ramos Corrada, comenta como lleía la Colección de Poesíes de Caveda, na so reedición de Canella, “mientres taba na playa”.
L'escritor y académicu de la llingua Vicente García Oliva consideró güei que la lliteratura infantil y xuvenil n'asturianu ta nesti momentu na so etapa d'espoxigue y madurez, cola apaición de temes diversos diferentes de los yá tradicionales, como yeren los didácticos o mitolóxicos.
Foi la conclusión principal de la so intervención güei nes Xornaes d'Estudiu de la Llingua Asturiana, qu'organiza l'Academia de la Llingua na Facultá de Filoloxía de la Universidá d'Uviéu.
D. BARREIRO
Mientres que’l 76% de la xeneralidá d’escritores n’asturianu nun dexaría enxamás de facer lliteratura nel nuesu idioma, esi porcentaxe medra hasta’l 90% cuntando namás les muyeres qu’escriben n’asturianu. Sicasí, la mayoría de les autores trabayen en dos llingües; castellán y asturianu, cosa que nun pasa colos homes. Amás, mientres que la mayoría d’escritores tuvieron dalgún contautu cola llingua nel sistema educativu (69%), mirando namás pa les muyeres, vemos que’l 68% nunca foron formaes n’asturianu.
L’Ayuntamientu d’Ayer convoca’l Primer Concursu de Cuentos Curtios pa xóvenes al que se podrán presentar toles persones interesaes ente 14 y 30 años con cuentos d’hasta cuatro fueyes y de tema ye llibre .
El plazu d'entrega d’orixinales ta abiertu hasta’l 15 de febreru de 2010, pudiendo entregase les obres en mano o unviase per corréu certificáu a la Casa Cultura, asitiada na Avenida de la Constitución 31, 33670 Morea d’Ayer, conseñando nel sobre "Pal I Concursu de Cuentos D. José Antonio Robles".
Tags
Esbilla
del.icio.us