La Conseyería d’Educación ta acabante de facer público’l conteníu del prósimu currículu pa la educación infantil. Nél rescampla otra vuelta’l tratu discriminatoriu al que vuelve sometese la llingua asturiana y principalmente a los neños y neñes qu’acceden al sistema educativu col asturianu como llingua materna. Pal Gobiernu asturianu nun tienen derechu nin a escolarizase na so llingua nin tan siquiera a conocela. Apuésatse asina por mantener la política de l’asimilación llingüística y cuanto primero, meyor.
La Xunta pola Defensa de la Llingua Asturiana ta acabante de facer públicu’l siguiente comunicáu:
EL PROYECTU DE CURRÍCULU D’EDUCACIÓN INFANTIL DEXA L’ASTURIANU COMO UNA LLINGUA DE CUARTA CATEGORÍA
La Xunta pola Defensa de la Llingua Asturiana quier llamar l’atención sobre la presencia testimonial de la llingua asturiana nel Proyectu de Decretu pol que se regulen los conteníos educativos y el currículu de la Educación Infantil n’Asturies, amás d’analizar les consecuencies que pue trayer pal futuru del idioma. Nel Proyectu de Currículu d’Educación Infantil presentáu va poco pol conseyeru d’Educación, Sr. Ripoedre, l’asturianu nun se cita esplícitamente nel so articuláu sinón con una mención mui difusa a la cultura asturiana (art. 7., puntu 3) y al falar del apreciu al patrimoniu cultural asturianu (art. 4., ap. h). La única mención esplícita ye nel Anexu, onde se fala de les árees que se toquen n’Educación Infantil. Al referise al Área de Llinguaxe, la mención al asturianu ye vaga por demás, calificándolo na introducción como elemento de la cultura y pidiendo un “tratamientu globalizáu desarrollando actitúes positives hacia’l conocimientu d’elementos básicos de comunicación”. Sicasí, nos oxetivos concretos, les úniques menciones esplícites son al castellanu y a la llingua estranxera. Nel apartáu de conteníos, depués de tratar estes llingües, fala tamién del “Respetu hacia otres llingües, y tamién hacia l’asturiana, los sos falantes y cultures”. Como se pue ver na propia redación, la referencia al asturianu ye de cuarta categoría: primero’l castellanu, depués la llingua estranxera, depués les otres llingües y, pa nun face-y un feu, l’asturianu. La montonera de referencies a la llingua como elementu de comunicación, a la importancia de la llingua oral, supónse referida namás al castellanu, inorando d’esta manera una realidá viva en toles escueles como ye la presencia del asturianu nos más pequeños. Ye esmolecedor qu’un documentu d’esta importancia nun s’encare con una cuestión tan fundamental y escape d’ella como si fora un tabú. Cualquiera qu’estudie’l documentu va sacar la conclusión de que los neños y neñes d’Asturies namás falen castellanu y que lo único qu’hai que regular ye cómo aprienden inglés.
El proyectu de Currículum de’Educación Infantil amuesa a les clares qué ye lo que piensen aquellos que lu proponen y qué consideración tienen pa col asturianu. Pa eso, amás de zarrar los güeyos a la realidá llingüística asturiana, escaecen disposiciones llegales como la Llei d’Usu y l’articuláu del mesmu Estatutu d’Autonomía d’Asturies, onde s’espresa ensin duldes la esistencia del idioma y onde s’obliga a entamar acciones qu’ayuden a la so normalización en toles estayes de la sociedá, incluyida l’enseñanza. Tamién s’escaez l’alcuerdu de Plantiyes d’Educación Infantil y Primaria del Principáu d’Asturies, onde queda recoyío que se va dotar con un especialista de Llingua Asturiana a tolos centros. A too esto hai qu’amestar que la situación que se vive anguaño nes aules asturianes namás val p’amenorgar l’estatus de la llingua y contribuir a la so desapaición adulces: sigue faltándo-y un tratamientu d’igual a igual con respectu a les demás asignatures y acaba paeciendo un asuntu secundariu delantre de los rapacinos y de tola comunidá escolar. ¿Cómo va llamase seriu un programa educativu que desprecia l’enseñu de la llingua materna y que, en cuenta de tratar de correxir la desigualdá secular nesta materia, lo que fai ye aprovechase de les consecuencies d’esi despreciu centenariu p’ayudar conscientemente a que desapaeza? La Xunta pola Defensa de la Llingua Asturiana quier dexar claro qu’estes midíes tán preparando’l camín pa que la llingua tenga cada vuelta menos presencia na sociedá asturiana a tolo llargo de les etapes educatives. Y eso faise arrincándola de raíz nos planes educativos onde ye más necesaria -nos ciclos de los escolinos más pequeños-, siguiendo con un tratamientu d’asignatura “maría” nos de los más mozos -y esto namás ellí onde se da-, y acabando pola falta d’una especialidá universitaria. El ramu a esti procesu, como nun cansen d’avisar los responsables del gobiernu d’Asturies, sería que na próxima redacción del Estatutu d’Autonomía l’asturianu nun se declarare llingua oficial. Dende la Xunta pola Defensa de la Llingua Asturiana esiximos la incorporación de la Llingua Asturiana de manera esplícita nel Currículu d’Infantil y facemos un llamamienu a la comunidá escolar pa que, en plazu correspondiente, presente toles alegaciones necesaries que faigan falta pa correxir esti gravísimu disparate qu’acaba d’ufiertar la Conseyería d’Educación y Ciencia.
Xunta pola Defensa de la Llingua Asturiana. N’Asturies, miércoles 16 de xineru de 2008.
Esbilla
del.icio.us