La Mancomunidá d’El Cabu Peñes, informó ayeri al traviés del so Serviciu de Normalización Llingüística, de dos nueves campañes en llingua asturiana, una al rodiu les sos fiestes y festivales y otra empobinada a los neños y neñes de 0 a 3 años. Les campañes tán coordinaes dende la REDE y sofitaes pola Conseyería de Cultura y Turismu del Principáu d’Asturies.

La primer campaña, “De mariaxe peles nuestres tierres” ye “un convite a les nuestres fiestes: momentos de charres y allegríes, de música y dances, de gocie de bones comíes y compañes; y too añerao pola meyor de les regaces: la mar”. Apúrrese tamién un vocabulariu de pexe y mariscu en tres llingües y una tabla marees pa los meses de branu y que col eslogan “Ensin pone-y portielles a la mar”, quier dar la bienvenida a tol que visita estes tierres.

Per otru llau, la campaña “Medrando n’asturianu” cuenta con un material bien prestoso que consiste nuna carpeta con testos de xuegos y que contién: un baberu, un mididor, una pegatina pal coche y una ficha con una añada y vocabulariu afayadizu. Y ye qu’asina como recueye la campaña na so carta presentación: “El mundu ye guapu porque ye diversu y reconocer esa diversidá y valorala fainos meyores persones”. Esti ye’l megollu d’esta campaña dirixida a lo más “piquiñino” de la casa.

(d'Asturnews, 25-07-2008)

L'Academia de la Llingua Asturiana y el Conceyu de Carreño roblaron esti pasáu martes 22 de xunetu un conveniu de collaboración col envís de normalizar l'usu del asturianu nel conceyu y col enfotu de trabayar pola promoción, espardimientu y dignificación del usu del asturianu nel so ámbitu y sobre manera nel de la so Alministración Local.

Asina l'Academia va asesorar al mesmu, ente otres xeres, na rotulación de les dependencies y servicios municipales, na igua de la toponimia local y recoyida oral qu'esti conceyu pela so parte tamién se comprometió en llevar alantre.

La firma cuntó cola presencia de Manuel Ángel Riego González, Alcalde de Carreño, y Ana María Cano González, Presidenta de l'Academia de la Llingua Asturiana, que roblaron esti documentu nun actu tuvo llugar a les 12:30 hores nel Salón de Plenos de la Casa Conceyu. La firma d'esti conveniu de collaboración aprobóse por unanimidá de tolos grupos políticos del Conceyu en comisión de Cultura.

(d'Asturies.com, 25-07-2008)

Redacción.

Mapa editáu en Cangas pa recuperar la toponimia tradicional
La Comisión de Cultura del Conceyu de Carreñó aprobó’l 17 de Xineru por tolos grupos políticos la convocatoria d’unes beques pa la recopilación de la toponimia del conceyu. Inicialmente, y en collaboración cola Academia de la Llingua Asturiana, l'Ayuntamientu convocará estes beques pa facer los trabayos d'investigación, y será l'Academia quien los vaya publicando. Al final d'esti procesu, y colos trabayos de toles parroquies completaos, l'Ayuntamientu recopilará y editará un llibru con tola toponimia menor del Conceyu.

Esta propuesta trata de recuperar y evitar que se pierdan los nomes tradicionales de llugar asturianos: nomes d'accidentes xeográficos, montes, praos, cases, ríos, fontes, etc, y pretende rescatar la sabiduría popular y les denominaciones tradicionales que demientres sieglos fueron emplegaes polos vecinos de Carreño. Les denomaciones van acompangaes d'una curtia descripción de caúna d'elles, gracies a les informaciones de bonos falantes y conocedores de la xeografía.

D'esta mena, y con esta propuesta, nesta llexislatura completaráse la recopilación de los nomes de llugar asturianos de les parroquies del Conceyu. Esti proyeutu d'investigación toponímica foi entamáu nos años 90 pola Academia de la Llingua Asturiana, que ya tien investigaos y publicaos pa Carreño los estudios de les parroquies de Tamón, Ambás, El Valle y Candás, polo que les beques diríen dirixíes a les 8 parroquies que tienen pendiente l'estudiu.

A día de güei, l'Academia de la Llingua Asturiana tien publicáu l'estudiu toponímicu d'unes 125 parroquies de les 1000 qu'aproximadamente tien Asturies. Carreño convertiríase, xunto con Amieva, nel primer conceyu que completa l'estudiu de la toponimia menor.

(d'Asturnews.com, 23-01-2008)

Redacción.

Con dalgo de retrasu entamó esti sábadu la IV Selmana de la Cultura Astur, en La Baragaña (Candás), qu’organiza’l Grupu de Baille Tradicional San Félix. La presentación del númberu 3 de la revista Formientu pol so director, Inaciu Galán, abrió dos díes nos que’l pueblu de Candás disfrutó de los actos de la IIª Feria del Discu y el Llibru n’Asturianu. Una feria na que se presentaron munches de les novedaes lliteraries y musicales d’esti añu 2007.

Xurde Fernández, que ye de Candás y yera ún de los organizadores d’esti eventu, presentó’l llibru ‘Volver’, espublizáu pola editorial Ámbitu. Y darréu actuó’l grupu Xentiquina pa los neños y a pesar del fríu de la tarde nueche en Carreño. ‘Vía de Serviciu’, el primer llibru de la Editorial Suburbia y el recital de Pablo Texón, Sergio Camblor y Pablo X. Suárez remató’l día xunto a l’actuación del dúu Mestura, qu’anguaño promociona’l discu ‘Agua del norte’. El domingu volvió a cuntar col sofitu de públicu del conceyu.

(d'Asturnews, 12-11-2007)

Redacción.

El Grupu de Baille Tradicional San Félix organiza esta fin de selmana la IV Selmana de la Cultura Astur, en La Baragaña (Candás). L’actu va cuntar con un amagüestu popular y la II Feria del Discu y el Llibru n’Asturianu. Nesta feria van presentase munches de les novedaes lliteraries y musicales d’esti añu 2007. El primeru d'estos actos, el sábadu a les seis de la tarde, cola presentación del númberu 3 de Formientu.

El sábadu a les seis de la tarde va entamar esta II Feria del Discu y del Llibru n’Asturianu cola presentación del númberu trés de la revista lliteraria Formientu, que ta dedicada a la lliteratura erótica de los escritores más mozos. Media hora más tarde Xurde Fernández va presentar el llibru Volver, espublizáu pola editorial Ámbitu. A les siete va acutar el grupu Xentiquina pa los neños del conceyu.

A les ocho la tarde va presentase Vía de Serviciu, el primer llibru de la Editorial Suburbia y a les ocho y media, Pablo Texón, Sergio Camblor y Pablo X. Suárez van facer un llectura de poemes. A les nueve la nueche va pesllase’l día cola actuación del dúu Mestura, qu’anguaño promociona’l discu ‘Agua del norte’.

Yá’l domingu, a les seis menos cuartu, repite Mestura, pero esta vegada pa los neños, cola actuación y los ‘Poemes de carambelu’ de Marisa y Luis. A les seis y media preséntase la revista Remanecer, que llega yá al so segundu númberu. A les siete, Alberto Álvarez Peña presenta la Guía de la Mitoloxía Asturiana, de la Editorial CH. Los actos de pieslle d’esta IV Feria va centrala la presentación del tercer númberu de la revista ‘El Cuirno’ a les siete y media y un conciertu de música tradicional a les ocho la nueche. Dos díes nos que Candás va convertise na capital de la música y la lliteratura n’asturianu.

(d'Asturnews, 09-11-2007)