Redacción

Como resultáu de los alcuerdos de gobiernu del pasáu martes 8 d'abril, apruébase la toponimia del conceyu d'Ayer, d'alcuerdu colo conseñao nel Plan de Normalización Social y a la Llei d'Usu y Promoción del Asturianu, qu'establez " que los topónimos d'Asturies tendrán la denomación oficial que correspuenda cola so forma tradicional".

Con ésti yá son 27 los conceyos asturianos que ven aprobada la so toponimia: Ayer, Carreño, El Franco, Llanes, Gozón, L.lena, Llangréu, Cabranes, Sariegu, Bimenes, Villaviciosa, Xixón, Nava, La Ribera, Colunga, Noreña, Grau, Amieva, Corvera, Ribadeva, Pezós, Morcín, Grandas de Salime, Casu, A Veiga, Llaviana y Samartín del Rei Aurelio. Teniendo dellos la doble denomación, como ye'l casu de Gijón/Xixón o La Ribera/Ribera de Arriba.

Según esta normativa, les alministraciones públiques tán obligaes a dir adautando d'un mou progresivu les rotulaciones nes víes públiques y carreteres del conceyu, asina como nos mapes y planos oficiales.

(d'Asturies.com, 09-04-2008)

Redacción

Esti miércoles 31, a les 13 hores nel Hotel d’Asociaciones de La Pola (L.lena) presentábase en rueda de prensa la Caravana pola Oficialidá que va recorrer los conceyos de L.lena y Ayer el sábadu 3 de payares. La Caravana, convocada pol Conceyu Abiertu pola Oficialidá, qu’axunta más de 200 organizaciones de toa Asturies, va percorrer dende pela mañana Uxo, Felechosa, Cabanaquinta, Morea, Mieres, La Pola, Campumanes y Carabanzo.

La hora de salida ye a les 10:30 de la Escuela La Salle d’Uxo, n’acabando la caravana va facese una espicha en Carabanzo pa depués rematar los actos con un conciertu nel Teatru Vital Aza a les 19h onde van participar: Liseo (gaitiru de Carabanzo), Pingüínos Asesinos, Adizión Etílika y Fala non Caduca, toos ellos grupos del conceyu de L.lena.

El CAO pretende averar a los conceyos la llingua asturiana y la necesidá de qu’esista un marcu llegal pa la llingua asturiana como ye la oficialidá na prosima reforma estatutaria. Nesti sentíu, la caravana ye un actu más colos que’l Conceyu Abiertu pola Oficialidá quier animar a la xente a que participe na prósima manifestación pola oficialidá de la llingua asturiana que se va facer el 24 de noviembre a les 18h n’Uvieo. La manifestación cuenta con 6 marches a pie dende distintes zones d’Asturies (Xixón, Caudal, Nalón, Avilés, Trubia, Siero), que van xuntase na Estación de la Renfe d’onde va salir la menifestación.

(d'Asturnews, 1-11-2007)