La Conceyalía de Cultura y Deportes del Conceyu de Tinéu, en collaboración cola Conseyería de Cultura, convoca'l XII Certame Lliterariu César Feito, abiertu a la participación de tolos escolinos del conceyu. Nel concursu pueden presentase un máximu de dos trabayos orixinales, qu'han tar escritos n'asturianu.
La Oficina Municipal de la Llingua del Conceyu de Xixón editó nestos díes un xuegu destináu principalmente a los neños, anque non necesariamente, que se presenta col títulu de Nun quedes en porrica. Nél, al traviés d’entrugues (sobre temes como xeografía, ortografía o refranes), traballingües o la fechura d’un puzzle, los xugadores van perdiendo o ganando ropa del traxe tradicional asturianu (que se pon y se quita d’unos dibuxos recortaos que representen a dos mozos y dos moces), y gana’l que llegue al final con más prendes puestes. Esti xuegu foi ganador del concursu ¡Vas velo! Trebeyos pal aula, entamáu pola propia Oficina ente los estudiantes d’ESO de los institutos de Xixón. Resultó ganadora la clas de 3.u d’ESO del IES Padre Feijoo.
La Xunta pola Defensa de la Llingua Asturiana encamentó güei, al traviés d'un comunicáu a "a tolos estudiantes, families, trabayadores de la enseñanza y a cualquier persona que pueda tener información sobre agresiones a los derechos na enseñanza del asturianu, a que se pongan en contactu cola Xunta pola Defensa de la Llingua pa denunciar y actuar contra estos fechos".
El sindicatu d'enseñanza Suatea confirmó güei que la inspeición educativa solucionó yá'l casu del alumnu del segundu de la ESO d'un institutu de Xixón al que s'escolarizare sin consulta previa na optativa de francés por falta d'alumnos matriculaos n'asturianu, la materia qu'él escoyere. Al paecer, había otros dos estudiantes na mesma situación, colo que decidió formase una clase de trés escolinos de Llingua Asturiana.
El martes 6 d'ochobre, a les 18:00 hores, desarrollóse l'apertura del cursu d'Estensión Universitaria "Metodoloxía del trabayu de campu en dialectoloxía, toponimia y cultura popular" na Facultá de Filoloxía de la Universidá d'Uviéu cola asistencia de Consuelo Vega Díaz, Directora Xeneral de Política Llingüística, Ramón d'Andrés Díaz, coordinador del Seminariu de Filoloxía Asturiana, y Fernando Álvarez-Balbuena, director del cursu.
El Sindicatu Autónomu de Trabayadores de la Enseñanza d'Asturies (Suatea) acusó güei, nuna nota prensa, a la Conseyería d'Educación de "tratu discriminatoriu" contra un alumnu de segundu d'ESO de Xixón qu'escoyera la optativa d'asturianu, como llevaba faciendo en tola so etapa educativa, y al que, sin previu avisu nin comunicación, incluyóselu na clase de francés.
Dientro del so programa de cursos d'alfabetización, l'academia de la llingua va entamar, en xunto cola Asociación Folklórica y Cultural Los Yerbatos, un cursu de llingua pa persones adultes en Bimenes. El cursu va impartise na casa la cultura de Santuyano del 6 d'ochobre al 3 d'avientu, los martes y los xueves de 18:00 a 20:00 hores, y ta abiertu a tolos interesaos, que namás tendrán que pagar los materiales didácticos.
(d'El Solanu, 01-10-2009)
Guei, Setiembre y 28, y dica Outubre y 9 queda abiertu'l plazu de matricula nos cursos 2009-2010 de Llingua Llïonesa na Conceyería de Cultura Llïonesa del Conceyu de Llión a cargu'l llïonesista Abel Pardo Fernández. Seis sedrán los niveles cun un preciu pur alunu de 10 Euros pa empadronaos na ciudá de Llión y 20 Euros el restu d'interesaos. Pa informacion ya iscriciones los interesaos deberán dirixise a la Conceyería de Cultura Llïonesa, asitiada nel Palaciu Don Gutierre, Plaza de Don Gutierre, nº2. Tlfnu. 987 344 370.
(del Conceyu de Llión, 28-09-2009)
El Conseyu de Gobiernu de la Universidá d'Uviéu aprobó güei los cuatro títulos de grau nos que se dividirán de magar agora los estudios de la Facultá de Filoloxía, dientro del Espaciu Européu d'Educación Superior, al que se tán adautando les enseñances universitaries. Nellos, inclúise'l Mínor d'Asturianu, títulu menor qu'integra la primer vez la llingua asturiana nos estudios de la Institución.
En rueda prensa tres el Conseyu de Gobiernu, el rector, Vicente Gotor, informó d'esti trámite. Diose autorización pa la tresformación de titulaciones al Espaciu Européu. Nesti ámbitu aprobáronse pa la Facultá de Filoloxía los graos d'Estudios Clásicos Románicos, Estudios Ingleses, Llingua Española y les sos Lliteratures y Llingües Modernes y les sos Lliteratures. Nesti últimu inclúise'l Minor de Llingua Asturiana, como un bloque d'ente seis y ocho asignatures que sumarán 48 creitos.
Tags
Esbilla
del.icio.us